जळगाव लाईव्ह न्यूज । ४ मार्च २०२१ । टरबूजविक्रीच्या गाडीतून चक्क गांज्याची तस्करी करणाऱ्या तिघांच्या बाजारपेठ पोलिसांनी मुसक्या आवळल्या.
नाहाटा महाविद्यालयाजवळ शनिवारी पहाटे या आरोपींच्या ताब्यातून सुमारे साडेआठ लाख रुपये किंमतीचा गांजा जप्त करण्यात आल्याची माहिती सहा.पोलिस अधीक्षक अर्चित चांडक यांनी दिली. या प्रकारामुळे शहरात एकच खळबळ उडाली आहे.
गांजा तस्करी करणारा मुख्य मालक पसार असून त्याचा कसून शोध घेतला जात आहे. शहरात गेल्या काही वर्षात प्रथमच मोठी कारवाई झाल्याने पोलिसांच्या कामगिरीचे कौतुक होत आहे. आरोपींना न्यायालयाने पाच दिवसांची पोलिस कोठडी सुनावली आहे. अटकेतील आरोपींमध्ये दोन सुरतच्या तर एका भुसावळातील आरोपीचा समावेश आहे.
यागांजा तस्करीप्रकरणी शब्बीर कालेखान पठाण (40, अकबर की वाडी, खोलवड, ता.कामरीज, जि.सुरत), शेख अकील शेख लतीफ (34, बापूनगर, झोपडपट्टी खोलवाडा, ता.कामरीज, जि.सुरत) व शेख शरीफ शेख (33, मुस्लीम कॉलनी, उस्मानीया मशीदजवळ, भुसावळ) या आरोपीस अटक करण्यात आली. मुख्य आरोपी हमी समशोद्दीन पतंगवाला नवीन ईदगाहच्या पाठीमागे, भुसावळ हा पसार झाला आहे.
ही कारवाई पोलिस उपअधीक्षक सोमनाथ वाघचौरे, सहा.पोलिस अधीक्षक अर्चित चांडक यांच्या मार्गदर्शनाखाली बाजारपेठचे सहा.निरीक्षक गणेश रामदास धुमाळ, सहा.निरीक्षक अनिल छबूराव मोरे, हवालदार जिजाबराव पाटील, अयाज अली, सुनील सोनवणे, रमण सुरळकर, समाधान पाटील, उमाकांत पाटील, प्रशांत परदेशी, सुभाष साबळे, ईश्वर भालेराव, करतारसिंग पररेशी आदींच्या पथकाने केली. तपास सुनील सोनवणे, अनिल पाटील, किशोर महाजन करीत आहेत.
