जळगाव लाईव्ह न्यूज । ६ जुलै २०२२ । भुसावळहुन मेमूने इटारसीकडे प्रवेश करणाऱ्या प्रवाशांसाठी महत्वाची बातमी आहे. ती म्हणजे भुसावळ ११०७७ भुसावळ-कटनी ही गाडी गुरुवार व शुक्रवारी (७ व ८ जुलै) कटनी ऐवजी केवळ खंडवा स्थानकापर्यंत धावणार आहे. तर बुधवार व गुरुवारी (६ व ७ जुलै ) ११११६ व ११११६ भुसावळ-इटारसी मेमू रद्द करण्यात आली आहे. यामुळे भुसावळातून सावदा, रावेर, बऱ्हाणपूर येथे अप-डाऊन करणाऱ्या नोकरदारांची गैरसोय होणार आहे.
तर कटनीपर्यंत जाणाऱ्या प्रवाशांना केवळ खंडव्यापर्यंत प्रवास करता येईल. भुसावळ स्थानकातून सुटणारी ११०७७ भुसावळ-कटनी एक्सप्रेस गाडी ७ व ८ जुलै रोजी कटनी स्थानकाऐवजी केवळ खंडवा स्थानकापर्यंत धावेल. परतीच्या प्रवासात ११०२८ कटनी-भुसावळ एक्सप्रेस खंडवा येथून तिच्या नियोजित वेळेवर सुटेल. दोन दिवस खंडवा ते कटनीदरम्यान एक्स्प्रेस रद्द होईल.
तर ११११५ भुसावळ-इटारसी मेमू बुधवार व गुरुवारी रद्द केली आहे. परतीच्या प्रवासात मेमू क्रमांक ११११६ इटारसी-भुसावळ मेमू गाडी ७ व ८ जुलै रोजी रद्द राहील. प्रवाशांनी या नुसार नियोजन करावे, असे प्रशासनाने कळवले आहे.