जळगाव लाईव्ह न्यूज । २४ एप्रिल २०२४ । लोकसभा निवडणुकीसाठी उमेदवारी अर्ज दाखल करण्याचे शेवटचे दोन दिवस शिल्लक राहिले असून आज आणि उद्या महाविकास आघाडी व महायुतीच्या माध्यमातून जोरदार शक्तिप्रदर्शन केले जाणार आहे. २४ व २५ एप्रिल रोजी अनुक्रमे महाविकास आघाडी व महायुतीच्या उमेदवारांचे अर्ज दाखल केले जातील. याच पार्श्वभूमीवर शिवसेना ठाकरे गटाचे नेते खासदार संजय राऊत जळगावात दाखल झाले आहे.
जळगाव विमानतळावर त्यांचे ठाकरे गटाचे संपर्क प्रमुख संजय सावंत यांच्यासह जळगाव मनपाचे माजी महापौर भाग्यश्री महाजन आणि माजी उपमहापौर कुलभूषण पाटील यांच्यासह आदींनी स्वागत केलं. लोकसभा निवडणुकीसाठी खऱ्या अर्थाने बुधवारपासून वातावरण तापायला सुरुवात होणार आहे.
महाविकास आघाडीकडून जळगाव लोकसभा निवडणुकीसाठी भाजपला सोडचिट्टी देऊन ठाकरे गटात गेलेले करण पवार यांना उमेदवारी जाहीर केली आहे. तर रावेरमधून श्रीराम पाटील यांनी उमेदवारी जाहीर केली आहे. तर दुसरीकडे महायुतीकडून जळगावमधून भाजपने स्मिताताई वाघ तर रावेरमधून रक्षा खडसेंना उमेदवार जाहीर केली आहे.२४ व २५ एप्रिल रोजी अनुक्रमे महाविकास आघाडी व महायुतीच्या उमेदवारांचे अर्ज दाखल केले जातील. त्यापूर्वी जोरदार शक्तिप्रदर्शन केले जाणार आहे.
