जळगाव लाईव्ह न्यूज । २९ मार्च २०२२ । वडिलांसोबत माहेरी जाऊ न दिल्याच्या रागातून पाचोरा येथील एका विवाहितेनं पतीसह सासू सासऱ्यांसोबत धक्कादायक कृत्य केलं आहे. विवाहितेने चक्क गुंगीचे औषध देत तिच्या पतीसह सासू व सासऱ्यांना लोखंडी आसारीने मारहाण केल्याची घटना समोर आली आहे. या प्रकरणी विवाहितेसह तिच्या वडिलांवर पाचोरा पोलीस ठाण्यात गुन्हा दाखल करण्यात आला आहे.
याबाबत पोलिसांकडून मिळालेली माहिती अशी, अर्जुन उखा पाटील (वय ५२, रा. कोंडवाडा गल्ली, पाचोरा) हे पत्नी विजयाबाई, मुलगा राहुल आणि सून पल्लवी पाटील यांच्यासह राहतात. राहुलचे सासरे साहेबराव साडू म्हस्के (रा. साबेलवाडी बदनापूर पो. खामगाव जिल्हा जालना) हे मुलीला भेटण्यासाठी आले. त्यावेळी पल्लवी हिने वडिलांसोबत माहेरी जाण्याची परवानगी मागितली. तिला सासरे अर्जुन पाटील, पती राहुल आणि सासू विजयाबाई यांनी नकार दिला.
याचा राग मनात ठेवून २७ मार्च रोजी रात्री साडेआठ वाजण्याच्या सुमारास पल्लवी हिने पिण्याच्या पाण्यात गुंगीचे औषध टाकून पती व सासू-सासऱ्याला प्यायला दिले. या गुंगीच्या औषधाने तिघांना झोप लागली. त्यानंतर तिनं व तिच्या वडिलांनी मिळून या तिघांनाही लोखंडी गजाने बेदम मारहाण केली.
या प्रकरणी पल्लवीचे सासरे अर्जुन पाटील यांनी पाचोरा पोलीस ठाण्यात बेदम मारहाण व जीवे ठार मारण्याचा प्रयत्न केल्याची तक्रार केली. त्यावरून सुन पल्लवी उर्फ कडूबाई राहुल पाटील व साहेबराव साडू म्हस्के यांच्या विरोधात पाचोरा पोलीस ठाण्यात गुन्हा दाखल करण्यात आला आहे. गुन्हा दाखल झाल्यानंतर दोघांना पोलिसांनी ताब्यात घेतले आहे. पुढील तपास सहाय्यक पोलीस निरीक्षक राहुल मोरे करीत आहेत.