जळगाव लाईव्ह न्यूज । २५ जानेवारी २०२२ । यावल तालुक्यातील कासारखेडा गावात शनिवारी मध्यरात्रीनंतर अज्ञात चोरट्यांनी चार ठिकाणी घरफोडी केली. यात मंदिरासह दुकान व दोन बंद घरांचा समावेश आहे. या घरांमधील रहिवासी बाहेरगावी गेले असल्याने घरातून किती मुद्देमाल चोरीस गेला, हे अद्याप स्पष्ट झाले नाही. घरफोडीची माहिती मिळताच पोलिस पथकासह दाखल झाले. त्यांच्या वतीने संबंधित कुटुंबांना माहिती देण्यात आली.
कासारखेडा येथील निंबा पुना कुंभार व सुकलाल मिस्त्री हे कुटुंबासह घराला कुलूप लावून बाहेरगावी गेले आहेत. रविवारी सकाळी नागरिकांना त्यांच्या घरांचे दरवाजे उघडे दिसले. पाहणीनंतर त्यांच्या घरात चोरी झाल्याचे समजले. त्याचप्रमाणे गावातील श्री तुकाराम महाराज मंदिरातील दान पेटी देखील फोडलेल्या अवस्थेत दिसून आली. तसेच गावातील मोना इलेक्ट्रॉनिक या दुकानामध्येही चोरी झाल्याचे उघड झाले. त्यामुळे गावात एकाच रात्री चार ठिकाणी चोरी झाल्याची माहिती नागरिकांनी येथील पोलिसांना दिली.
पोलिस निरीक्षक सुधीर पाटील यांच्या मार्गदर्शनाखाली पोलिस उपनिरीक्षक जितेंद्र खैरनार, सहाय्यक फौजदार अजीज शेख, हवालदार नरेंद्र बागुले, गणेश ढाकणे, संदीप सूर्यवंशी, रोहिल गणेश यांच्या पथकासह घटनास्थळी दाखल झाले. त्यांनी चाेरी झालेल्या या चारही ठिकाणांची पाहणी केली. मंदिराच्या दानपेटीतून किती रक्कम लांबवली हे मात्र समजू शकले नाही. तर दाेन्ही कुटुंबे घरी परतल्यावर घरातून काय व किती चोरी झाली आहे, हे स्पष्ट होईल. मात्र, एकाच रात्री गावात चार ठिकाणी चोरी झाल्यामुळे गावामध्ये भीतीचे वातावरण पसरले आहे.
हे देखील वाचा :
- जळगाव जिल्ह्यात वाळूमाफियांवर पोलिसांची मोठी कारवाई; ८८ लाखांचा मुद्देमाल जप्त, २१ जणांवर गुन्हे दाखल
- कर्जबाजारीपणा अन् नैराश्यातून अमळनेरातील तरुण शेतकऱ्याने उचललं धक्कादायक पाऊल
- अट्टल मोटारसायकल चोर पाचोरा पोलिसांच्या जाळ्यात ; चार दुचाकी हस्तगत
- चोपड्यात अमली पदार्थांवर पोलिसांचा दणका; ७ किलो गांजासह तीन तस्करांना अटक!
- जळगावात अज्ञात वाहनाच्या धडकेत दुचाकीस्वाराचा जागीच मृत्यू
