जळगाव लाईव्ह न्यूज । दिवाळीचा सण जवळ येत असतानाच जळगावच्या सुवर्ण बाजारपेठेत सोने आणि चांदीच्या दरातील घसरण सुरूच आहे. दसऱ्यानंतर सुरू झालेली दरकपात आज शुक्रवारीही कायम राहिली. आज सकाळी बाजार उघडल्यावर सोन्याच्या दरात १,१२३ रुपयांची घसरण झाली. तर चांदी दरात प्रति किलो तब्बल ६१८० रुपयांची घसरण झाली. त्यामुळे दिवाळी, लग्नसराई आणि सणासुदीसाठी दागिने किंवा भेटवस्तू खरेदी करण्याचा विचार करणाऱ्यांना दिलासा मिळण्याची शक्यता आहे.
काय आहेत सोन्याचा दर?
जळगावच्या सराफा बाजारात काल गुरुवारी सोन्याच्या दरात ८२४ रुपयांची घट झाली होती. त्यामुळे जीएसटीसह २४ कॅरेट सोन्याचा दर प्रति १० ग्रॅम १ लाख ४८ हजार ११४ रुपयांवर आला होता. त्यानंतर आज शुक्रवारी सकाळी बाजार सुरू होताच सोन्याच्या दरात आणखी १,१२३ रुपयांची घसरण झाली. या घसरणीनंतर तीन टक्के जीएसटीसह २४ कॅरेट सोन्याचा दर प्रति १० ग्रॅम १ लाख ४६ हजार ९९१ रुपयांवर पोहोचला. सलग दोन दिवस सोन्याचे दर कमी झाल्याने ग्राहकांना खरेदीसाठी काहीसा दिलासा मिळाला आहे.
चांदी दोन दिवसांत १२ हजारांहून अधिक रुपयांनी स्वस्त
सोन्याच्या तुलनेत चांदीच्या दरातील घसरण अधिक ठळक ठरली आहे. गुरुवारी चांदीच्या दरात ६,१८० रुपयांची घट झाल्याने तीन टक्के जीएसटीसह प्रति किलो दर २ लाख १० हजार १२० रुपयांवर आला होता. शुक्रवारी सकाळी आणखी घसरण नोंदविण्यात आली. शुक्रवारी चांदीचा दर जीएसटीसह प्रति किलो २ लाख ३ हजार ८५० रुपयांपर्यंत खाली आल्याचे दिलेल्या माहितीत नमूद करण्यात आले आहे. त्यामुळे दोन दिवसांत चांदीच्या दरात मोठी घसरण झाली आहे. चांदीचे दागिने, पूजेचे साहित्य आणि भेटवस्तू खरेदी करणाऱ्यांसाठी ही दरकपात महत्त्वाची ठरू शकते.
सोने-चांदीचे दर का घसरत आहेत?
आंतरराष्ट्रीय बाजारातील घडामोडींचा परिणाम सोने आणि चांदीच्या किमतींवर होत असतो. ऊर्जा किमतींमधील वाढ, महागाईबाबतची चिंता, अमेरिकेतील महागाईची आकडेवारी आणि व्याजदरांबाबतची अनिश्चितता यामुळे गुंतवणूकदारांच्या भूमिकेत बदल होत आहेत. अमेरिकेच्या फेडरल रिझर्व्हच्या व्याजदरविषयक निर्णयाकडेही बाजाराचे लक्ष आहे. व्याजदर उच्च राहण्याची शक्यता वाढल्यास डॉलर आणि रोख्यांवरील परताव्याचा परिणाम सोन्यासारख्या व्याज न देणाऱ्या मालमत्तेच्या आकर्षणावर होऊ शकतो. परिणामी, आंतरराष्ट्रीय बाजारात सोने-चांदीच्या दरांमध्ये चढ-उतार पाहायला मिळतात.
दिवाळीपूर्वी खरेदी वाढणार का?
दिवाळी आणि लग्नसराईच्या पार्श्वभूमीवर सोने-चांदीच्या दरातील घसरण ग्राहकांसाठी खरेदीची संधी ठरू शकते. मात्र, दर आणखी कमी होतील या अपेक्षेने काही ग्राहक खरेदी पुढे ढकलू शकतात. त्यामुळे दर कमी झाल्यानंतरही सराफा बाजारात मागणी वाढते का, याकडे व्यापाऱ्यांचे लक्ष लागले आहे.
