जळगाव लाईव्ह न्यूज । महादेव हॉस्पिटल, जळगाव येथे मूत्रविज्ञान (युरोलॉजी) क्षेत्रात लेझर तंत्रज्ञानाच्या सहायाने चिर न देता मूतखडयावर मात करण्यासाठी अत्याधुनिक उपचारपद्धतीचा अवलंब करत फ्लेक्सिबल युरेटेरोस्कोपी विथ लेझर पल्व्हरायझेशन ही अत्याधुनिक शस्त्रक्रिया प्रथमच यशस्वीरित्या पार पडली. चोपडा येथील ५० वर्षीय महिलेच्या उजव्या मूत्रपिंडामध्ये खडा असल्याचे निदान झाले होते.
त्यांच्यावर महादेव हॉस्पिटलमध्ये राईट आरआयआरएस ( रेट्रोग्रेड इंट्रारेनल सर्जरी) विथ लेझर पल्व्हरायझेशन ही अत्याधुनिक शस्त्रक्रिया यशस्वीरित्या करण्यात आली.आरआयआरएस म्हणजे रेट्रोग्रेड इंट्रारेनल सर्जरी, ही मूत्रपिंडातील खडे काढण्यासाठी वापरली जाणारी अत्याधुनिक व कमी त्रासदायक शस्त्रक्रिया आहे. या पद्धतीत कोणतीही चीर न देता लवचिक युरेटेरोस्कोपच्या साहाय्याने मूत्रमार्गातून मूत्रपिंडापर्यंत पोहोचून लेझरच्या मदतीने खड्याचे बारीक तुकडे केले जातात. त्यामुळे रुग्णाला कमी वेदना होतात, रक्तस्राव कमी होतो व लवकर बरे होण्यास मदत होते.
महादेव हॉस्पिटलच्या युरोलॉजी विभागाने ही शस्त्रक्रिया यशस्वीपणे पूर्ण करून रुग्णाला मोठा दिलासा दिला आहे. या यशस्वी शस्त्रक्रियेसाठी कार्यरत असलेल्या तज्ज्ञ डॉक्टरांच्या चमूमध्ये प्रा. व विभागप्रमुख डॉ. हेमंत केळकर, प्रा. डॉ. हर्षद चौहान, डॉ. शुभम चौधरी आणि डॉ. श्रीकांत रेड्डी यांचा समावेश होता. भूलतज्ज्ञांच्या चमूमध्ये प्रा. डॉ. रघुनाथ बराटे आणि डॉ. ननिता चौधरी यांनी महत्त्वपूर्ण भूमिका बजावली.अत्याधुनिक फ्लेक्सिबल युरेटेरोस्कोपी व लेझर तंत्रज्ञानामुळे आता मूत्रपिंडातील खड्यांवर सुरक्षित, प्रभावी आणि जलद उपचार उपलब्ध झाले आहेत. रुग्णाची प्रकृती समाधानकारक असून त्यांना लवकरच घरी सोडण्यात येणार असल्याची माहिती हॉस्पिटल प्रशासनाने दिली.
या यशस्वी शस्त्रक्रियेमुळे महादेव हॉस्पिटलने प्रगत आणि कमीत कमी चिरफाडीतून होणार्या उपचारांच्या दिशेने आणखी एक महत्त्वाचा टप्पा गाठला आहे. मूत्रपिंडातील व मूत्रमार्गातील खडे काढण्यासाठी वापरण्यात येणारी ही आधुनिक पद्धत रुग्णांसाठी अधिक सुरक्षित, कमी वेदनादायी आणि जलद पुनर्वसन करणारी मानली जाते. लेझरच्या सहाय्याने खड्यांचे सूक्ष्म कणांमध्ये रूपांतर करून त्यांचे प्रभावीरीत्या निर्मूलन करण्यात येते.
-डॉ.हेमंत केळकर
