जळगाव लाईव्ह न्यूज । १५ जून २०२१ । रस्त्यात आडव्या आलेल्या नीलगाईला धडक दिल्याने दुचाकीस्वार तरुणाचा मृत्यू झाल्याची घटना रात्री शेळगाव भादली रस्त्यावर घडली. श्याम शांताराम कोळी (वय ३५ रा. आसोदा) असे मृत तरुणाचे नाव आहे. याप्रकरणी पोलीसात अकस्मात मृत्यूची नोंद करण्यात आली आहे.
श्याम कोळी हे रात्री १ ते २ वाजेच्या सुमारास हे घरी जात असताना रस्त्यावर अचानक दुचाकीची नीलगाईला धडक बसली. त्यात श्याम कोळी यांचा मृत्यू झाला. पहाटे शेतात जाणाऱ्या भादलीच्या शेतकर्यांमुळे हा प्रकार समोर आला. हा प्रकार आज मंगळवारी सकाळी ६ वाजता शेतात जाणाऱ्या शेतकऱ्यांच्या लक्षात आल्याने उघडकीला आला.
श्याम कोळी यांचा मृतदेह जिल्हा शासकीय वैद्यकीय महाविद्यालयात आणण्यात आला. शवविच्छेदन करून मृतदेह नातेवाईकांच्या ताब्यात देण्यात आला आहे.
