जळगाव लाईव्ह न्यूज । चोपडा तालुक्यातील धानोरा येथील दुर्गा विसर्जन मिरवणुकीला गालबोट लागल्याची घटना घडली. दुर्गा विसर्जनदरम्यान काही दुर्गा मंडळात गुलाल फेकण्याच्या वादावादीवरून दगडफेक करण्यात आली. यात तीन जण गंभीर जखमी झाले तर एक जण किरकोळ जखमी झाला. मागील तीन वर्षात विसर्जन मिरवणुकीत दगडफेकीची ही दुसरी घटना आहे.
गावात तेरा दुर्गा मंडळ विसर्जन मिरवणूक शांततेत सुरू असताना रात्री नऊ वाजेच्या सुमारास सतपंथ ज्योत मंदिर परिसर व गांधी चौक भागात गुलालाची उधळण सुरू असताना वाद झाले. त्यावरून दगडफेक करण्यात आली. यात किशोर चौधरी, मंथन दिनकर चौधरी, चेतन महाजन हे गंभीर जखमी झाले तर मुस्तफा तडवी ये किरकोळ जखमी झाले. यातील गंभीर जखमी यांना चोपडा उपजिल्हा रुग्णालयात उपचारार्थ नेण्यात आले.
यावेळी गावात पळापळ सुरू झाल्याने महिला प्रचंड भयभित झाल्या. याप्रकरणी रात्री उशिरापर्यंत अडावद पोलिस ठाण्यात गुन्हा दाखल करण्याचे काम सुरू होते.
