जळगाव लाईव्ह न्यूज । १४ मे २०२१ । रुग्णालयात दाखल असलेल्या पतीस पाहण्यासाठी आलेल्या महिलेच्या पर्समधून अज्ञात चोरट्यांने १५ हजार रूपयांची रोकड लांबविल्याची घटना घडलीय. याबाबत शहर पोलीसात अज्ञात चोरट्यावर गुन्हा दाखल झाला आहे.
याबाबत असे की, जामनेर तालुक्यातील शेंदूर्णी येथील रहिवासी अलका लोणे व त्यांचे पती मधूकर लोणे दोघाना कोरोनाची लागण झाल्याने त्यांना जळगावातील अश्विनी हॉस्पिटल येथे उपचारार्थ दाखल केले आहे. त्यांना मेडिकल बिलाकरीता साडे बारा हजार व जेवणाच्या डब्यासाठी अडीच हजार रूपये असे त्यांच्या मुलीने आई अलका लोणे यांच्याकडे दिले होते. ते पैसे अलका यांनी पर्समध्ये ठेवले होते.
दरम्यान, गुरूवार, १२ मे रोजी पती मधूकर यांनी जेवण केले की नाही, याची विचारपूस करण्यासाठी अलका हया आयसीयू रूममध्ये गेल्या, तेवढयात त्यांच्या पर्समधील पंधरा हजार रूपयांची रोकड अज्ञात चोरटयाने चोरून नेली. पाच ते सहा मिनिटानंतर त्या त्यांच्या जागेवर आल्या असता, त्यांना पर्समधील रोकड गायब झालेली दिसून आली. हा प्रकार त्यांनी लागलीच मुलगी युवती हिला सांगितला व डॉक्टरांना सुध्दा घटना कळविली. अखेर युवती राहुल पाटील यांनी गुरूवारी रात्री शहर पोलीस ठाण्यात दिलेल्या तक्रारीवरून अज्ञात चोरटयाविरूध्द गुन्हा दाखल करण्यात आला आहे.
