जळगाव लाईव्ह न्यूज । २१ जुलै २०२२ । पाचोरा अत्याचार प्रकरणातील पसार असलेल्या संशयिताला अखेर महिनाभराने अटक करण्यात आले. या प्रकरणी पिंपळगाव हरेश्वर पोलिस स्टेशनला गुन्हा दाखल झाला होता. अभिमान ऊर्फ आबा अंबादास वाघमारे (कोळी) (वय २६, रा. घोसला, ता. सोयगाव) असे अटकेतील संशयिताचे नाव आहे.
संशयित अभिमान ऊर्फ आबा अंबादास वाघमारे (कोळी) (वय २६, रा. घोसला, ता. सोयगाव) हा गुन्हा दाखल झाल्यापासून पसार झाला होता. त्यामुळे पोलिसांसमोर संशयिताचा शोध घेण्याचे आव्हान होते. संशयिताच्या अटकेसाठी सहाय्यक पोलिस निरीक्षक महेंद्र वाघमारे व पोलिस उपनिरीक्षक अमोल पवार यांच्या मार्गदर्शनाखाली पोलिस नाईक गोकूळ सोनवणे, कॉन्स्टेबल जितेंद्र पाटील यांनी शोध घेतला. गुप्त माहितीवरून संशयिताला पोलिसांच्या पथकाने १६ जुलैला ताब्यात घेत, पिंपळगाव हरेश्वर पोलिस ठाण्यात हजर केले.
गुन्हा घडल्यानंतर महिनाभराचा कालावधी उलटल्यानंतर पोलिसांनी संशयिताच्या मुसक्या आवळल्या. पुढील तपास सहाय्यक पोलिस निरीक्षक महेंद्र वाघमारे यांच्या मार्गदर्शनाखाली पोलिस उपनिरीक्षक अमोल पवार हे करत आहेत. संशयिताकडून गुन्ह्याची सखोल माहिती पोलिस अधिकारी घेत आहेत.
