जळगाव लाईव्ह न्यूज । सर्वसामान्य माणूस आता महागाईत चांगला भरडला जाणार आहे. कारण भारतीय रिझर्व्ह बँकेने (RBI) रेपो रेटमध्ये 0.25 टक्के म्हणजेच 25 बेसिस पॉईंट्सची वाढ केली आहे. रिझर्व्ह बँकेने जवळपास 44 महिन्यानंतर रेपो दरात वाढ केली असून त्यामुळे कर्जदारांच्या मासिक EMIचा भार वाढण्याची शक्यता आहे.
RBIचे गव्हर्नर संजय मल्होत्रा यांनी आज या निर्णयाची घोषणा केली. या वाढीनंतर रेपो रेट 5.25 टक्क्यांवरून 5.50 टक्क्यांवर पोहोचला आहे. RBIच्या या निर्णयाचा थेट परिणाम कर्जदारांवर होण्याची शक्यता असून, होम लोन, कार लोन आणि पर्सनल लोनच्या व्याजदरात वाढ होऊ शकते. त्यामुळे कर्जदारांच्या मासिक EMIचा भार वाढण्याची शक्यता आहे.
EMI का वाढणार?
रेपो रेट म्हणजे RBIकडून बँकांना अल्प मुदतीसाठी दिल्या जाणाऱ्या कर्जाचा प्रमुख दर. RBIने रेपो रेट वाढवल्याने बँकांसाठी निधी उभारण्याचा खर्च वाढू शकतो. त्याचा परिणाम बँकांच्या कर्जदरांवर होण्याची शक्यता असते.
त्यामुळे नवीन कर्ज घेणाऱ्या ग्राहकांना अधिक व्याजदराचा सामना करावा लागू शकतो. तसेच फ्लोटिंग व्याजदरावर कर्ज घेतलेल्या ग्राहकांच्या EMIमध्ये वाढ किंवा कर्जाचा कालावधी वाढण्याची शक्यता आहे.
यापूर्वी कधी वाढला होता रेपो रेट?
RBIने यापूर्वी फेब्रुवारी 2023 मध्ये रेपो रेटमध्ये 0.25 टक्क्यांची वाढ केली होती. त्यानंतर रेपो रेट 6.50 टक्क्यांवर पोहोचला होता. 2023-24 या संपूर्ण आर्थिक वर्षात या दरात कोणताही बदल करण्यात आला नव्हता.
यानंतर 2025 मध्ये RBIने व्याजदर कपातीला सुरुवात केली होती. मात्र, आता पुन्हा रेपो रेटमध्ये 0.25 टक्क्यांची वाढ करण्यात आल्याने कर्जदारांच्या चिंतेत भर पडली आहे. रेपो रेट वाढल्याने महागाई नियंत्रणात आणण्याचा प्रयत्न होत असला, तरी त्याचा परिणाम सर्वसामान्यांच्या कर्जाच्या EMIवर होण्याची शक्यता आहे.
