जळगाव लाईव्ह न्यूज । १ मार्च २०२२ । चिनावल येथील भर वस्तीत देशी दारू विक्रीचे दुकान सुरू करण्यासाठी ग्रामपंचायतीने परवानगी देऊ नये, अन्यथा रस्त्यावर उतरून तीव्र आंदोलन करू असा इशारा महिला-पुरूष असे तब्बल २०० जणांनी समोवारी येथील सरपंच व ग्रामसेवकाला निवेदन दिले.
चिनावल येथील कुंभारखेडा रस्त्यावरील गट क्रमांक ८८८ प्लॉट क्रमांक ११ व १२ या जागेवर चंद्रकांत डोंगर भंगाळे यांनी किरकोळ देशी दारू विक्रीचे दुकान सुरू करण्यासाठी ग्रामपंचायतीकडे ना हरकत प्रमाणपत्राची मागणी केली आहे. ३१ जानेवारीच्या ग्रामसभेतील चर्चेतून हा मुद्दा पुढे आला. ही माहिती कानावर येताच कुंभारखेडा रस्त्यावरील सर्व रहिवाशांचे पित्त खवळले. या देशी दारू विक्रीच्या दुकानामुळे रहिवाशांना भविष्यात विनाकारण मनस्ताप होऊ शकतो. परिसरातील मुलांना देखील व्यसन लागू शकते. तसेच या जागेच्या बाजूला महिलांचे शौचालय आहे. महिलांचा येण्या-जाण्याचा रस्त्यावर देशी दारू विक्रीच्या दुकानासमोरून आहे. त्यामुळे दारूड्यांच्या उपद्रवातून महिला सुरक्षेचा मुद्दा गंभीर होऊ शकतो. या जागेच्या परिसरात शाळा, मंदिर व कब्रस्तान आहे. या सर्व ठिकाणचे पावित्र्य पाहता देशी दारूच्या दुकानाला ना हरकत प्रमाणपत्र देऊ नये, असा पवित्रा आंदोलनकर्त्या रहिवाशांनी घेतला.
सरपंचांना दिलेल्या निवेदनावर भावना पाटील, कल्पना भिरूड, प्रियंका भिरूड, विमल अंगाडे, सविता भंगाळे, मनीषा पाटील, ललिता कंडारे, मंगला नेमाडे, लक्ष्मी कंडारे, सोनाबाई कंडारे, पद्माबाई कंडारे, छाया कंडारे, कमलाबाई काळे, ज्योती कंडारे, विजया पाटील, अनिता कंडारे, शिवानी कंडारे, एकता कंडारे, शिवानी कंडारे, मीनाक्षी नेमाडे, प्रतिभा भंगाळे, वंदना बोनडे, लीना वायकोळे, कल्पना पन्नासे, मालती मालखेडे, अर्चना बढे अशा सुमारे १९३ महिलांच्या स्वाक्षऱ्या आहेत. सर्वांनी देशी दारूच्या दुकानाला तीव्र विरोध दर्शवला.
