जळगाव लाईव्ह न्यूज । जळगावचे तत्कालीन पोलीस अधीक्षक आणि महाराष्ट्र कॅडरचे २०१२ बॅचचे वरिष्ठ भारतीय पोलीस सेवा (IPS) अधिकारी डॉ. एम. सी. व्ही. महेश्वर रेड्डी यांची केंद्रीय औद्योगिक सुरक्षा दलात (CISF) उपमहानिरीक्षक (DIG) पदावर नियुक्ती करण्यात आली आहे. केंद्रीय प्रतिनियुक्तीवर त्यांची ही नियुक्ती करण्यात आली असून, केंद्रीय गृह मंत्रालयाने यासंदर्भातील आदेश जारी केले आहेत.
डॉ. महेश्वर रेड्डी यांनी जळगाव जिल्ह्याचे पोलीस अधीक्षक म्हणून जबाबदारी सांभाळली आहे. जळगाव पोलिसांच्या अधिकृत नोंदींमध्येही त्यांचा पोलीस अधीक्षक म्हणून उल्लेख आहे. त्यांच्या कार्यकाळात जिल्हा पोलीस दलाच्या विविध उपक्रमांना आणि कारवाईला गती मिळाली होती.
केंद्रीय गृह मंत्रालयाचे अवर सचिव संजीव कुमार यांनी १६ सप्टेंबर २०२६ रोजी महाराष्ट्र शासनाच्या मुख्य सचिवांना पत्र पाठवून डॉ. महेश्वर रेड्डी यांच्या नियुक्तीची माहिती दिली. सक्षम प्राधिकरणाने केंद्रीय सेवेच्या प्रचलित अटी व शर्तींनुसार त्यांच्या केंद्रीय प्रतिनियुक्तीस मंजुरी दिल्याचे पत्रात नमूद करण्यात आले आहे.
केंद्रातील नवीन जबाबदारी तातडीने स्वीकारता यावी, यासाठी डॉ. महेश्वर रेड्डी यांना त्यांच्या सध्याच्या पदावरून तात्काळ कार्यमुक्त करण्याचे निर्देश महाराष्ट्र शासनाला देण्यात आले आहेत.या नियुक्ती आदेशाची प्रत महाराष्ट्राचे पोलीस महासंचालक (DGP), CISFचे महासंचालक, नवी दिल्ली तसेच केंद्रीय गृह मंत्रालयातील संबंधित विभागांना पुढील कार्यवाहीसाठी पाठविण्यात आली आहे.
एका दृष्टिक्षेपात
अधिकारी : डॉ. एम. सी. व्ही. महेश्वर रेड्डी, IPS
कॅडर : महाराष्ट्र
बॅच : २०१२
जळगावमधील जबाबदारी : तत्कालीन पोलीस अधीक्षक
नवीन पद : उपमहानिरीक्षक (DIG)
दल : केंद्रीय औद्योगिक सुरक्षा दल (CISF)
नियुक्ती : केंद्रीय प्रतिनियुक्ती
आदेश दिनांक : १६ सप्टेंबर २०२६
आदेश क्रमांक : 1-21016/36/2026-IPS.III
