जळगाव लाईव्ह न्यूज । २७ मे २०२२ । श्रीराम मंदिर संस्थानतर्फे श्री संत मुक्ताबाई ७२५ व्या पुण्यतिथीनिमित्ताने कीर्तन, महाभिषेकासह विविध कार्यक्रम घेण्यात आले. यात संत मुक्ताबाई पुण्यतिथीनिमित्ताने ‘तुम्ही संत मायबाप कृपावंत’ या तुकाराम महाराजांचे अभंगावर कीर्तन घेण्यात आले.
श्रीराम मंदिरात संत मुक्ताईंच्या पुण्यतिथीनिमित्ताने पहाटे ५ ते ७ वाजता आदिशक्ती श्री संत मुक्ताबाई पादुकांवर महाअभिषेक करण्यात आला. श्रीराम महाराज यांच्या हस्ते हे पूजन करण्यात आले तर पौरोहित्य नंदू शुक्ल गुरुजी यांनी केले. तर सकाळी १० वाजता प्रभाकर महाराज शिंपी वावडदेकर यांचे कीर्तन झाले. ‘तुम्ही संत मायबाप कृपावंत’ या अभंगावर झालेल्या या कीर्तनाचा जळगावसह शिरसोली, मोहाडी, हरिविठ्ठलनगर, वाल्मीकीनगर, मेहरूण परिसरातील भाविकांनी लाभ घेतला.
सायंकाळी श्रीराम मंदिरात हरिपाठ श्री संत मुक्ताईकृत ताटीचे अभंग रामनामावली, रामरक्षा स्तोत्र होऊन धुपारती झाली. या निमित्ताने श्री मुक्ताई मंदिरात राजू भावसार यांनी रांगोळी काढली होती. मंगेश महाराज यांच्या मार्गदर्शनाखाली श्रीधर जोशी, बापू सोनार, निंबा पाटील, अशोक शिंपी, सदाशिव तांबट, जानकीराम भोई, देवेंद्र मोरदे, जगदीश भावसार, कारभारी गव्हाणे, दिलीप कोळी, दत्तात्रय तेली, भगवान सुतार, प्रकाश गोसावी आदींनी कार्यक्रमासाठी सहकार्य केले. या कार्यक्रमामुळे परिसरात धार्मिक वातावरण निर्माण झाले हाेते.
