जळगाव लाईव्ह न्यूज । जळगावच्या धरणगाव येथे बेकायदेशीररीत्या वास्तव्य करणाऱ्या एका इराणी महिलेच्या अटकेनंतर हे प्रकरण खूपच गंभीर वळणावर पोहचले आहे. सुरुवातीला हे फक्त अवैध मुक्कामाचे प्रकरण वाटले असले तरी पोलिस तपासात आता धक्कादायक माहिती समोर आलीय.
अटकेत असलेल्या इराणी महिलेचे धागेदोरे थेट शत्रूराष्ट्र पाकिस्तानपर्यंत जोडलं गेलं असल्याचं पोलीस तपासात उघड झाल्यामुळे हे प्रकरण आता राष्ट्रीय सुरक्षा संदर्भात महत्वाचे बनले आहे
धरणगाव येथे इराणी महिलेसह तिच्या तीन वर्षाच्या मुलाला बेकायदेशीररीत्या आश्रय दिल्या प्रकरणात धरणगाव पोलिसात गुन्हा दाखल करण्यात आला आहे. या गुन्ह्यात इराणी महिलेला आश्रय देणाऱ्या तसेच मोबाईल सिम कार्ड पुरवणाऱ्या तिघांना अटक करण्यात आली आहे. धरणगाव पोलिसांनी जेव्हा संशयितांचे मोबाईल जप्त करून त्यांची तपासणी केली, तेव्हा त्यांना काही आंतरराष्ट्रीय नंबर आढळून आले. तपासात असे समोर आले की, आरोपींनी पाकिस्तानातील एका व्यक्तीला व्हॉट्सॲप आणि व्हिडिओ कॉल केले होते. विशेष म्हणजे हा नंबर ‘सलमान भाई’ या नावाने मोबाईलमध्ये सेव्ह करण्यात आला होता.
या ‘सलमान’ नावाच्या व्यक्तीशी नेमकी काय चर्चा झाली आणि तो नेमका कोण आहे, या प्रश्नाने आता सुरक्षा यंत्रणांची झोप उडवली. या प्रकरणात तेलंगाणा कनेक्शन देखील समोर आलंय. पोलिसांनी आतापर्यंत तिघांना अटक केली असून, त्यातील एक आरोपी तेलंगणा राज्यातील आहे. या तिसऱ्या आरोपीनेच संबंधित इराणी महिलेला बनावट कागदपत्रांच्या आधारे सिम कार्ड मिळवून दिले होते. दरम्यान, हे प्रकरण आता फक्त बेकायदेशीर वास्तव्याच्या पलीकडे जाऊन राष्ट्रीय सुरक्षा संदर्भात महत्वाचे बनले आहे.
धरणगाव न्यायालयाने या प्रकरणाचे गांभीर्य लक्षात घेऊन तिन्ही आरोपींचा जामीन फेटाळून लावला आहे. आता पोलीस या ‘सलमान’ नावाच्या व्यक्तीचा चेहरा आणि त्याचा खरा हेतू शोधण्यासाठी तांत्रिक तपासाचा वेग वाढवत आहेत.
