जळगाव लाईव्ह न्यूज । २६ जून २०२१ । जिल्ह्यातील आणि शहरातील बातम्या मी नियमितपणे ‘जळगाव लाईव्ह’च्या माध्यमातून वाचत असतो. जळगाव लाईव्ह न्यूजकडून दिल्या जाणाऱ्या बातम्या वास्तविक आणि खऱ्या असल्याने अल्पावधीतच त्यांनी जनमानसात विश्वासार्हता निर्माण केली आहे आणि भविष्यात देखील ती कायम राहील असे प्रतिपादन जैन उद्योग समुहाचे अध्यक्ष अशोक जैन यांनी केले.
जिल्ह्यातील प्रत्येक घटना घडामोडींचा अचूक वेध घेणारे जळगाव लाईव्ह न्युज पोर्टल अल्पावधीतच वाचकांच्या पसंतीस उतरले आहे. १२१ दिवसात जळगाव लाईव्हने ५१ लाख वाचकांचा टप्पा पूर्ण केल्यानंतर शनिवारी जैन उद्योग समुहाचे अध्यक्ष अशोक जैन यांच्या हस्ते पोर्टलचे अधिकृतपणे लोकार्पण करण्यात आले.
शिरसोली रस्त्यावर असलेल्या जैन इरिगेशनमध्ये जळगाव लाईव्ह न्यूजच्या लोकार्पणाचा छोटेखानी कार्यक्रम पार पडला. यावेळी जळगाव लाईव्हचे प्रमुख तुषार भांबरे, चेतन वाणी, रजत भोळे, चेतन पाटील, वसीम खान, चिन्मय जगताप, गौरी बारी, जकी अहमद, जैन उद्योग समूहाच्या मीडिया विभागाचे उपाध्यक्ष अनिल जोशी आदी उपस्थित होते.
अशोक जैन यांनी जळगाव लाईव्हच्या आजपर्यंतच्या वाटचालीची संपूर्ण माहिती घेत आजवर राबविण्यात येत असलेल्या कार्यक्रमाबद्दल संपूर्ण टीमचे कौतुक केले. तसेच जळगाव लाईव्हला भविष्यातील वाटचालीसाठी शुभेच्छा दिल्या.