जळगाव लाईव्ह न्यूज । २० ऑगस्ट २०२५ । जळगावसह राज्यात अपघाताच्या प्रचंड वाढल्या असून दिवसेंदिवस या घटनांमध्ये वाढ होताना दिसत आहे. याच दरम्यान आज पहाटे एसटी बस आणि खासगी टेम्पोची जोरदार धडक होऊन झालेल्या भीषण अपघातात एकाचा मृत्यू झाला तर पाच जण गंभीर जखमी झाले आहेत. ही घटना भडगाव-पारोळा मार्गावर वाघरे गावाजवळ घडली असून या घटनेने परिसरात एकच खळबळ उडाली आहे.
नेमकी घटना काय ?
या घटनेबाबत असे की, सोयगावहून धुळ्याकडे जाणारी एसी बस (क्र. MH-14-BT-1984)ला वाघरे गावाजवळ समोरून येणाऱ्या खासगी टेम्पो (क्र. MH-19-CY-1606) या वाहनाशी जोरदार धडकली. या धडकेनंतर बसमधील आणि टेम्पोमधील अनेक प्रवासी जखमी झाले. या भीषण अपघातात पंकज पाटील (३०, उंदीरखेडा) यांचा मृत्यू झाला आहे. तर अपघातातील जखमींना तातडीने पारोळा येथील सरकारी रुग्णालयात दाखल केले. काही रुग्णांची प्रकृती गंभीर असल्याने त्यांना अन्य खासगी रुग्णालयात हलविण्यात आले आहे.
जखमींचे नाव
या अपघातात मिराबाई पंढरी सोनवणे (५५, सोयगाव), निलाबाई घनश्याम सिरसागर (७५, धुळे), अंजनाबाई रघुनाथ पाटील (७०, हनुमंत खेडा), मनोहर सजन पाटील (६०, चोरवड), रमेश धोंडू चौधरी (८०, भडगाव), मीराबाई रघुनाथ पाटील (८०, धुळे) आणि जानवी संतोष मोरे (१९, धुळे) जखमी झाले असून या जखमींवर पारोळा आणि भोले विघ्नहर्ता रुग्णालयात उपचार सुरू आहेत. सागर मराठे आणि यश ठाकूर यांनी देखील जखमींना रुग्णालयात दाखल करण्यासाठी मदत केली.
याशिवाय रघुनाथ गणपंत सोनवणे (ढेकू) हे देखील या अपघातात जखमी झाल्याचे समजते. काही जखमींची ओळख अद्याप पटलेली नसून अधिकृत माहिती पोलीस तपासानंतर स्पष्ट होणार आहे. या प्रकरणी अधिक तपास पोलीस करत आहेत.
