जळगाव लाईव्ह न्यूज । कर्जाच्या परतफेडीसाठ दिलेला चेक न वटल्याप्रकरणी धनवर्ष अर्बन को-ऑप. क्रेडिट सोसायटीकडून कर्ज घेतलेल्या कर्जदाराला जळगाव येथील प्रथम वर्ग न्यायदंडाधिकारी यांनी १ वर्ष साध्या कैदेची शिक्षा सुनावली आहे. लखीचंद भगवान पाचपोळ असं शिक्षा झालेल्या कर्जदाराचे नाव आहे.
काय आहे प्रकरण
पाचपोळ यांनी सन २००६ मध्ये धनवर्षा पतसंस्थेकडून कर्ज घेतले होते या कर्जाच्या परतफेडीपोटी त्यांनी १० जानेवारी २००६ रोजी ९ लाख ७७ हजार रुपयांचा चेक संस्थेला दिला होता. मात्र खात्यात पुरेशी रक्कम नसल्याने हा चेक बँकेतून परत आला. पतसंस्थेने रीतस कायदेशीर नोटीस बजावूनही पाचपोळ यांनी रकमेचा भरणा केला नाही. अखेर संस्थेचे वसुली अधिकारी संजय श्रीधन सोनवणे यांनी खटला दाखल केला.
त्यात पाचपोळ दोषी सिद्ध झाल्याने त्यांना १ वर्ष साधी कैद आणि मूळ रकमेच्या दुप्पट म्हणजेच १९ लाख ५४ हजार रुपयांचा दंड ठोठावण्यात आला. तसेच फिर्यादी संस्थेचा खटल्यासाठी झालेला १५ हजार रुपये अतिरिक्त खर्चही आरोपीने द्यावा, असे आदेश न्यायालयाने दिले आहेत. धनवर्षा सोसायटीच्या वतीने अॅड. केतन जयदेव ढाके यांनी बाजू मांडली. दिवाणी न्यायाधीश जयदीप एम. चौहान यांनी हा निकाल दिला.
