जळगाव लाईव्ह न्यूज । ४ नोव्हेंबर २०२१ । अमळनेर तालुक्यातील मुंगसे येथून जवळच असलेल्या दापोरी खुर्द येथे तापी नदी पात्रात बालकाचा पाय घसरून पाण्यात बुडून मृत्यू झाल्याची दुर्दैवी घटना घडली. रोशन युवराज सोनवणे (वय ९) हा निंभोरा (ता. धरणगाव) येथील मुळ रहिवासी आहे.
तो दापाेरी येथील नामदेव सुका कोळी यांच्याकडे राहत होता. मुंगसे जि.प.शाळेत इयत्ता दुसरीमध्ये शिकत होता. दुपारी गुरांना पाणी पाजण्यासाठी नदीवर गेला असता पाण्यात पाय घसरल्याने बुडून त्याचा मृत्यू झाला. चोपडा येथे नेले असता डॉक्टरांनी मृत घोषित केले. निंभोरा येथे रात्री उशिरा शोकाकुल वातावरणात दफनविधी झाला. त्याच्या पश्चात तीन बहिणी, आई वडील, आजी-आजोबा असा परिवार आहे.