जळगाव लाईव्ह न्यूज । १३ मे २०२१ । गेल्या काही दिवसांपासून जळगाव शहरात  दुचाकी चोरट्यांनी धुमाकूळ घातला असून दररोज एक किंवा दोन दुचाकी चोरीला जाण्याच्या घटना आता नित्याच्याच झाल्या आहेत. या घटनांमुळे वाहनधारकांमध्ये भीतीचे वातावरण निर्माण झाले आहे, दरम्यान, योगेश्वरनगर येथे घरासमोरून एकाची दुचाकी चोरीस गेल्याची घटना घडली. याबाबत शनिपेठ पोलिस ठाण्यात गुन्हा दाखल झाला आहे.

याबाबत असे की, योगेश्वर नगरात गणपती मंदिराजवळ भाडेकरारावरील खोलीत संदीप सुरेश वाणी हे पत्नी व दोन मुली या कुटुंबासह वास्तव्यास आहेत. संदीप वाणी यांनी ४ मे रोजी रात्री नऊ वाजता नेहमीप्रमाणे त्यांची दुचाकी एमएच १९ सीडी  ३७६७ ही घरासमोर उभी केली होती. दुसऱ्या दिवशी ५ मे रोजी सकाळी ८.३० वाजता उठल्यावर घरासमोर त्यांची दुचाकी दिसून आले नाही.

सर्वत्र परिसरात तसेच बस स्थानक, शहर पोलिस ठाणे, रामानंदनगर एमआयडीसी पोलिस स्टेशन याठिकाणी दुचाकीचा शोध घेतला. मात्र दुचाकीबाबत कुठलीही माहिती मिळाली नाही. संदीप वाणी यांनी याबाबत शनिपेठ पोलिस ठाण्यात तक्रार दिली. पुढील तपास पोलिस नाईक अमोल विसपुते हे करीत आहेत.

जळगाव लाईव्ह न्यूज । १३ मे २०२१ । जळगाव शहरातील शिवकॉलनी स्टॉपजवळ भरधाव डंपरने एका तरुणाला चरडले आहे. यात डंपरचे चाक डोक्यावरून गेल्या तरूणाचा मृत्यू झाला तर दुचाकीस्वार गंभीर जखमी झाला आहे. धडक दिल्यानंतर डंपर चालकाने पळ काढला आहे.

याबाबत सविस्तर माहिती अशी कि, मंगळवारी रात्री दहा वाजता महामार्गावरील शिव काॅलनी थांब्याजवळ हा अपघात घडला आहे. श्याम सुरेश पाटील (३७, निवृत्ती नगर) असे मयत तरूणाने नाव असून दुचाकीस्वार परेश रवींद्र पाटील (२९, संभाजी नगर) हा गंभीर जखमी झाला आहे. परेश पाटील व श्याम पाटील दोघेही मित्र असून दूध फेडरेशनमध्ये कामाला होते.

मंगळवारी रात्री परेश हा टॉवर चौकात असताना श्याम पाटील याने ‘मी जैनाबाद मध्ये आहे मला घ्यायला ये’ असे सांगून परेशला बोलावून घेतले. तेथून परेशच्या (क्रमांक एम.एच.१९ सी.टी.०५९१) या दुचाकीने श्याम याला निवृत्तीनगरात घरी सोडण्यासाठी जात असताना रात्री दहा वाजता महामार्गावर शिव कॉलनी थांब्याच्या अलीकडे मागून भरधाव वेगाने आलेल्या पिवळ्या रंगाच्या डंपरने दुचाकीला जोरदार धडक दिली. त्यात मागे बसलेला श्याम खाली फेकला गेला. त्यात श्यामच्या डोक्यावरुन टायर गेले तर परेश लांब फेकला गेला. या घटनेत श्यामचा जागीच मृत्यू झाला. तर परेशच्या उजव्या हाताला व डोक्याला मार लागला आहे.

घटनेची माहिती मिळताच श्यामचा भाऊ अजय पाटील, राहुल पाटील, महेश पाटील, हितेश भदाणे आदींनी घटनास्थळी धाव घेतली. तातडीने दोघांना जिल्हा सरकारी रुग्णालयात हलविले. तेथे श्यामला मृत घोषित करण्यात आले तर परेश याला खाजगी रुग्णालयात हलवण्यात आले. त्याच्यावर उपचार सुरु असुन त्याच्या उजव्या भुवईवर सात टाके पडले आहेत तर डोक्याला व हाताला गंभीर दुखापत झाली आहे. याप्रकरणी जिल्हापेठ पोलीसात फरार डंपरचालकाविरूध्द गुन्हा दाखल करण्यात आला आहे.

जळगाव लाईव्ह न्यूज । १२ मे २०२१ । शहरात दुचाकी चोरट्यांनी धुमाकूळ घातला असून दिवसेंदिवस घटना वाढतच आहे. यामुळे वाहनधारकांमध्ये भीतीचे वातावरण पसरले आहे. दरम्यान, आता तर चक्क तरुणाच्या डोळ्यासमोरून दुचाकी लांबविल्याची घटना समोर आली आहे.

 शहरातील निवृत्तीनगरात काल मंगळवारी साडेआठ वाजता तरुण घराच्या गच्चीवर बोलत असतांना, त्याच्या डोळ्यादेखत दोघा चोरट्यांनी अंगणात उभी लांबविल्याची घटना घडली आहे. याप्रकरणी आज बुधवारी दुपारी जिल्हापेठ पोलीस ठाण्यात गुन्हा दाखल झाला आहे.

निवृत्ती नगरात निलेश दत्तात्रय पाटील वय ३१ हा कुटुंबासह वास्तव्यास आहे. तो खाजगी नोकरी करत असून त्याच्याकडे एम.एच.१९ बी.ई.८९५० या क्रमांकाची दुचाकी आहे.

काल मंगळवारी निलेशनेही दुचाकी नेहमीप्रमाणे अंगणात उभी केली होती. रात्री साडेआठ वाजेच्या सुमारास निलेश घराच्या गच्चीवर बोलत उभा होता. यादरम्यान दोन चोरटे आले. त्यांनी डोळ्यादेखत अंगणात उभी दुचाकी सुरु केली. सुरुवातीला मित्र दुचाकी घेवून जात असल्याचे निलेशला वाटले, मात्र यानंतर निलेशने गच्चीवर पाहिले असता, त्याचे मित्र नव्हते, कुणीतरी अज्ञात दोन व्यक्ती आपली दुचाकी घेवून जात असल्याची खात्री झाल्यावर निलेशने आरडाओरड केला व चोरट्यांचा बजरंग बोगद्यापर्यंत पाठलाग केला. मात्र चोरटे हाती लागले नाही. आज बुधवारी दुपारी निलेश पाटील याने जिल्हापेठ पोलीस ठाणे गाठून त्याची २० हजार रुपये किंमतीची दुचाकी चोरी झाल्याबाबत तक्रार दिली. त्यावरुन जिल्हापेठ पोलीस ठाण्यात अज्ञात दोघा चोरट्यांविरोधात गुन्हा दाखल करण्यात आला आहे. पुढील तपास पोलीस नाईक ज्ञानेश्‍वर सपकाळे हे करीत आहेत.