हायड्रोसेफॅलसवरील तज्ज्ञ न्युरोसर्जनकडून शस्त्रक्रिया यशस्वी
जळगाव लाईव्ह न्यूज । अवघ्या चार महिन्यांचे बाळ, सततचे रडणे, अस्वस्थता आणि झटक्यांमुळे चिंतेत पडलेले पालक… अशा परिस्थितीत योग्य वेळी निदान आणि तज्ज्ञ डॉक्टरांच्या उपचारांमुळे जळगाव जिल्हयातील बाळावर यशस्वी शस्त्रक्रिया करण्यात आली.
बाळाला मागील १५ दिवसांपासून सर्दी, खोकला आणि तापाचा त्रास होत होता. त्यासोबतच बाळ सतत रडत होते, अस्वस्थ राहत होते आणि त्याला झटके येत होते. अवघ्या चार महिन्यांच्या बाळामध्ये अशी लक्षणे दिसल्याने पालकांची चिंता वाढली. त्यानंतर बाळाला डॉ उल्हास पाटील रुग्णालयात उपचारासाठी दाखल करण्यात आले. आवश्यक वैद्यकीय तपासण्यांनंतर बाळाला हायड्रोसेफॅलस असल्याचे निदान झाले. हायड्रोसेफॅलस म्हणजे मेंदूतील पोकळ्यांमध्ये सेरेब्रोस्पायनल फ्लुइड या द्रवाचे प्रमाण वाढणे. त्यामुळे मेंदूवरील दाब वाढून लहान बालकांमध्ये सतत रडणे, चिडचिड, उलट्या, डोक्याचा आकार वाढणे आणि झटके येणे अशी लक्षणे दिसू शकतात.
न्यूरोसर्जरी विभागाकडून आव्हानात्मक शस्त्रक्रिया
आजाराचे गांभीर्य लक्षात घेऊन रुग्णालयातील न्यूरोसर्जरी विभागाच्या तज्ज्ञ पथकाने बाळावर तझ डॉ. अनिकेत पाटील यांनी शस्त्रक्रिया करण्याचा निर्णय घेतला. या शस्त्रक्रियेमध्ये मेंदूतील अतिरिक्त द्रव एका विशेष नळीच्या साहाय्याने पोटाच्या पोकळीत सोडला जातो. त्यामुळे मेंदूतील द्रवाचा निचरा होण्यास आणि मेंदूवरील अतिरिक्त दाब नियंत्रित करण्यास मदत होते.अवघ्या चार महिन्यांच्या बालकावर अशी शस्त्रक्रिया करणे हे वैद्यकीयदृष्ट्या अत्यंत काळजीपूर्वक नियोजन आणि कौशल्याचे काम असते. शस्त्रक्रियेदरम्यान तसेच त्यानंतर बालकाच्या प्रकृतीवर बारकाईने लक्ष ठेवणे आवश्यक असते.
बालरोग विभागाची महत्त्वपूर्ण भूमिका
शस्त्रक्रियेनंतर बाळाच्या पुढील उपचारांची आणि प्रकृतीच्या निरीक्षणाची जबाबदारी बालरोग विभागाने सांभाळली. बाळाचे श्वसन, तापमान, दूध पिण्याची क्षमता, झटक्यांची स्थिती आणि शंटशी संबंधित संभाव्य गुंतागुंत यांचे काळजीपूर्वक निरीक्षण करण्यात आले. न्यूरोसर्जरी आणि बालरोग विभागाच्या समन्वयातून बाळाला आवश्यक वैद्यकीय सेवा उपलब्ध करून देण्यात आली.
एकाच छताखाली प्रगत उपचार सुविधा- डॉ. अनिकेत पाटील
डॉ. उल्हास पाटील वैद्यकीय महाविद्यालय व रुग्णालयात न्यूरोसर्जरी, बालरोग विभाग, नवजात शिशू अतिदक्षता विभाग आणि बाल अतिदक्षता विभाग यांच्या माध्यमातून बालकांच्या गंभीर आजारांवर आवश्यक उपचार सुविधा उपलब्ध आहेत.लहान बालकांमध्ये सतत रडणे, असामान्य चिडचिड, वारंवार उलट्या किंवा झटके अशी लक्षणे दिसल्यास पालकांनी दुर्लक्ष न करता तातडीने वैद्यकीय सल्ला घ्यावा, असे आवाहन करण्यात येत आहे.
