जळगाव लाईव्ह न्यूज । २१ एप्रिल २०२६ । सध्या लग्नसराईचा हंगाम जोरात सुरू असून सोन्या-चांदीच्या दागिन्यांना मोठी मागणी आहे. मात्र, सोन्याच्या गगनाला भिडलेल्या किमतींमुळे सर्वसामान्यांचे बजेट कोलमडले आहे. सोन्याचे दर प्रति तोळा दीड लाखांच्या पार पोहोचल्याने ग्राहकांमध्ये चिंतेचे वातावरण असतानाच, आज बाजारातून एक संमिश्र बातमी समोर आली आहे.
सोन्याचे दर स्थिर
गेल्या अनेक दिवसांपासून सोन्याच्या भावात सातत्याने चढ-उतार पाहायला मिळत होते. मात्र, आज सोन्याच्या दरात कोणताही बदल झालेला नाही. सोन्याचे दर स्थिर राहिल्याने खरेदीदारांना काहीसा दिलासा मिळाला असला, तरी किमती उच्चांकी स्तरावर असल्याने ग्राहकांनी सध्या ‘वाट पाहा आणि मगच खरेदी करा’ अशी भूमिका घेतल्याचे चित्र दिसत आहे.
चांदीच्या दरात मोठी घट
सोन्याचे दर स्थिर असले तरी चांदीने मात्र ग्राहकांना दिलासा दिला आहे. आज चांदीच्या दरात मोठी घसरण झाली आहे. आज चांदी दर १०००० रुपयांनी घसरून २,६५,००० रुपये प्रति किलोवर पोहोचले आहे. चांदी स्वस्त झाल्यामुळे ज्यांना लग्नानिमित्त चांदीची भांडी किंवा दागिने खरेदी करायचे आहेत, अशा ग्राहकांसाठी ही चांगली संधी मानली जात आहे.
