खान्देशातील कोविड रुग्णालयांकडे ‘तब्बल’ इतक्या कोटीची थकबाकी

जळगाव लाईव्ह न्यूज । ३१ जानेवारी २०२२ । जळगावसह खान्देशातील विविध कोविड रुग्णालयांकडे ८ कोटी २६ लाख रुपयांचे वीजबिल थकीत आहे. त्यात शासकीय वैदकीय महाविद्यालयाकडे १ कोटी ६६ लाख तर जिल्हा रुग्णालयाकडे १० लाख ७५ हजार, गोदावरी फाउंडेशनकडे ४ कोटी ६६ लाख रुपयांची थकबाकी आहे. वारंवार पाठपुरावा करूनही संबंधितांनी थकबाकी भरलेली नाही. यामुळे कारवाई अटळ असल्याचा इशारा महावितरण प्रशासनाने दिला.

कोविड संकटातही महावितरणने नागरिकांसह सर्व रुग्णालये व अत्यावश्यक सेवांना अखंडित वीजपुरवठा केला. यात कोविड रुग्णांवर उपचार करणाऱ्या शासकीय व खासगी रुग्णालयांचा समावेश आहे. कोरोना काळात सेंटरचा वीजपुरवठा खंडित होणार नाही याची महावितरणने पूर्णपणे काळजी घेतली. त्यामुळे वीजपुरवठा खंडित न करता थकबाकी भरण्यासाठी संबंधित रुग्णालयांच्या प्रशासनाकडे महावितरण वारंवार पाठपुरावा करत आहे. मात्र, रुग्णालयांकडून प्रतिसाद नसल्याचे महावितरणचे म्हणणे आहे. जळगाव येथील शासकीय वैद्यकीय महाविद्यालय व रुग्णालयातील दोन वीजजोडण्यांची १ कोटी ६६ लाख ४२ हजार ६४० रुपये थकबाकी आहे. जिल्हा सामान्य रुग्णालयाकडे १० लाख ७५ हजार ८४८ रुपये, तर गोदावरी फाउंडेशनच्या डॉ. उल्हास पाटील वैद्यकीय महाविद्यालय व रुग्णालयाकडे ४ कोटी ६६ लाख ३६ हजार २२३ रुपयांचे वीजबिल थकीत आहे.

हिरे वैद्यकीय महाविद्यालयही थकबाकीदार
धुळे येथील भाऊसाहेब हिरे शासकीय वैद्यकीय महाविद्यालय रुग्णालयाकडे ८३ लाख ८० हजार ८८७ रुपये तर शिरपूर येथील शासकीय रुग्णालयाकडे १२ लाख ६७ हजार ७६ रुपये, नंदुरबार येथील जिल्हा सामान्य रुग्णालयाकडे ६१ लाख ४३ हजार ३२४ रुपये वीजबिल थकीत आहे. ही थकबाकी भरण्याचे पत्र मुख्य अभियंता कैलास हुमणे यांनी या रुग्णालयांच्या अधिष्ठाता व वैद्यकीय अधीक्षकांना दिले आहे. पण योग्य प्रतिसाद प्राप्त झालेला नाही. या मुळे आपल्या स्तरावर योग्य तो पाठपुरावा करून थकबाकी भरण्याची व्यवस्था करावी. अन्यथा, कंपनी नियमाप्रमाणे कार्यवाही करण्यात येईल, असे पत्रात म्हटले आहे. जळगाव, धुळे व नंदुरबारचे जिल्हाधिकारी तसेच जिल्हा शल्यचिकित्सकांनाही हे पत्र पाठवण्यात आले असल्याचे महावितरणने कळवले आहे.

हे देखील वाचा :

• जळगाव जिल्ह्यात ३१ जुलैपर्यंत पावसाचा ‘येलो अलर्ट’; हवामान खात्याचा इशारा
• रोटरॅक्ट डिस्ट्रिक्ट ३०३० च्या ‘योगपर्व २०२६’ स्थापना समारंभ
• जळगाव जिल्ह्यात वाळूमाफियांवर पोलिसांची मोठी कारवाई; ८८ लाखांचा मुद्देमाल जप्त, २१ जणांवर गुन्हे दाखल
• LPG सिलिंडर ते बँकिंग..! १ ऑगस्टपासून अनेक महत्त्वाचे नियम बदलणार ; खिशावर होणार थेट परिणाम
• रेल्वेच्या तत्काळ तिकीट बुकिंगच्या नियमांत १ ऑगस्टपासून मोठा बदल; काय आहे घ्या जाणून..