जळगाव लाईव्ह न्यूज । १३ जुलै २०२२ । चोपडा ३० जून रोजी भरदिवसा चोपड्यात व अमळनेरात घरफोड्या करणारा, नंदुरबार येथील संशयित जिम्मी उर्फ दीपक विपिन शर्मा (वय २९) याला स्थानिक गुन्हे शाखेने अटक केली होती. त्या गुन्ह्याच्या तपासात चोपडा शहर पोलिसांनी तीन दिवसांपूर्वी शर्मा याला अटक केली होती. न्यायालयाने त्याला पोलिस कोठडी सुनावली होती. दरम्यान शहर पोलिस ठाण्याच्या कोठडीत असताना, १२ रोजी सायंकाळी संशयिताने धारदार वस्तूने हाताच्या नसा व गळा कापून घेत आत्महत्येचा प्रयत्न केला.
संशयित शर्मा हा नंदुरबार येथील सराईत गुन्हेगार आहे. त्याने आतापर्यंत देशात वेगवेगळ्या ५० ठिकाणी गंभीर गुन्हे केले आहेत. ३० जून रोजी चोपड्यात त्याने भरदिवसा चार व अमळनेर येथे एक असे पाच घोरफोड्या केल्या होत्या. या गुन्ह्यात त्याने तब्बल साडेसहा लाखांचा ऐवज लांबवला होता. या पैशातून त्याने रेल्वेने मुंबई गाठून तेथून विमानाने दिल्ली गाठली होती. अमळनेरच्या घरफोडीत तो सीसीटीव्हीत कैद झाला होता. त्याची ओळख पटवण्याचा प्रयत्न करत असताना अमळनेर ते नरडाणा दरम्यान एका ढाब्यावरील सीसीटीव्हीत तो आढळला होता.
त्याला स्थानिक गुन्हे शाखेने सापळा रचून नंदुरबार येथून अटक केली होती. नंतर त्याला चोपड्याच्या गुन्ह्यात शहर पोलिसांकडे सोपवले होते. त्याने आत्महत्येचा प्रयत्न केल्यामुळे पोलिसांची धावपळ उडाली. त्याला उपजिल्हा रुग्णालयात दाखल केले. डॉ.पंकज पाटील, डॉ.हेमंत पाटील यांनी उपचार केले. डीवायएसपी कृषिकेश रावले यांनी या घटनेची माहिती जाणून घेतली होती.
