जळगाव । जळगाव विधान परिषद निवडणुकीतील एका जागेसाठी आज सकाळपासून मतदान प्रक्रियेला उत्साहात सुरुवात झाली. जिल्ह्यातील सातही मतदान केंद्रांवर कडेकोट पोलीस बंदोबस्तात शांततेत मतदान सुरू आहे. दरम्यान, सकाळी ८ ते १० या पहिल्या दोन तासांत २१७ मतदारांनी मतदानाचा हक्क बजावत ३४.४४ टक्के मतदानाची नोंद झाली आहे.
या निवडणुकीत एकूण ६३० मतदार असून, विशेष म्हणजे यात पुरुष आणि महिला मतदारांची संख्या प्रत्येकी ३१५ अशी अगदी समान आहे. निवडणूक विभागाच्या आकडेवारीनुसार, सुरुवातीच्या दोन तासांत १०० पुरुष तर ११७ महिलांनी मतदानाचा हक्क बजावला. टक्केवारीचा विचार केला तर पुरुषांचे मतदान ३१.७५ टक्के, तर महिलांचे मतदान ३७.१४ टक्के झाले आहे. त्यामुळे सकाळच्या सत्रात पुरुषांच्या तुलनेत महिला लोकप्रतिनिधी मतदानासाठी अधिक सक्रिय असल्याचे चित्र आहे.
चाळीसगाव अव्वल, अमळनेर संथ!
मतदान केंद्रनिहाय आकडेवारीवर नजर टाकल्यास चाळीसगावमध्ये सर्वाधिक ६५.८५ टक्के मतदानाची नोंद झाली आहे. त्याखालोखाल पाचोरा (५१.६७%), जळगाव (४३.८७%), फैजपूर (४०.५९%), एरंडोल (२base.३२%) आणि भुसावळ येथे १८.६४ टक्के मतदान झाले आहे. तर अमळनेर केंद्रावर सर्वात संथ गतीने म्हणजेच अवघे १०.५३ टक्के मतदान झाले आहे.
प्रशासनाने सर्व केंद्रांवर चोख व्यवस्था ठेवली असून दुपारनंतर मतदानाचा टक्का आणखी वाढण्याची शक्यता आहे. या चुरशीच्या निवडणुकीच्या निकालाकडे आता संपूर्ण जिल्ह्याचे लक्ष लागले आहे.
