⁠ 
शुक्रवार, मार्च 29, 2024

श्रीलंकेत हिंसाचार उफाळला, 5 ठार तर खासदाराने स्वतःवर गोळी झाडली

जळगाव लाईव्ह न्यूज । १० मे २०२२ । सोन्याची लंका असलेली श्रीलंका सध्या आर्थिक परिस्थिमुळे जळत आहे. सोमवारी पंतप्रधान महिंदा राजपक्षे यांनी विरोधकांच्या दबावाखाली राजीनामा दिल्यानंतर सर्वत्र हिंसक घटना घडत आहेत. राजपक्षे कुटुंबीयांचे समर्थक आणि विरोधकांमध्ये रस्त्यावर रक्तरंजित चकमकी सुरू आहेत. सरकार समर्थकांच्या हिंसाचारात आतापर्यंत खासदारासह 5 जणांचा मृत्यू झाला आहे.

हिंसाचाराच्या पार्श्वभूमीवर प्रशासनाने पुन्हा देशभर संचारबंदी लागू केली आहे, तर राजधानी कोलंबोमध्ये सुरक्षा व्यवस्थेची जबाबदारी लष्कराकडे सोपवण्यात आली आहे. दरम्यान,पोलिसांनी राष्ट्रपती गोटाबाया राजपक्षे आणि त्यांच्या कुटुंबीयांना पाठिंबा दिला आहे. त्यानंतर परिस्थिती चिघळली. सर्वसामान्यांनी सत्ताधारी पक्षाच्या खासदार, मंत्र्यांसह अन्य नेत्यांवर हल्ले करण्यास सुरुवात केली. जमावापासून वाचण्यासाठी एका खासदाराने आत्महत्या केली, तर दोन मंत्र्यांची घरे जाळण्यात आली.

धक्कादायक म्हणजे सत्ताधारी पक्षाचे खासदार अमरकीर्ती अथुकोराला यांनी सोमवारी प्रथम सरकारविरोधी निदर्शकांवर गोळीबार केला आणि नंतर स्वत:वर गोळी झाडली. कोलंबोच्या हद्दीत हा अपघात झाला.

न्यूज एजन्सी एएफपीनुसार, पोलिसांनी सांगितले की, अमरकिर्तीने नितांबुआ येथे त्यांची कार थांबवण्याचा प्रयत्न करणाऱ्या दोन लोकांवर गोळीबार केला. गोळी लागून एकाचा मृत्यू झाला. यानंतर लोकांचा रोष टाळण्यासाठी खासदाराने जवळच असलेल्या इमारतीत लपण्याचा प्रयत्न केला. मात्र संतप्त लोकांनी संपूर्ण इमारतीला घेराव घातला. लोकांनी वेढलेले पाहून खासदाराने स्वत:वर गोळी झाडली, त्यामुळे त्यांचा मृत्यू झाला.

आतापर्यंत 138 जण जखमी झाले आहेत
गाले फेस येथे निदर्शने करणाऱ्या लोकांचे तंबू सरकार समर्थक निदर्शकांनी उखडून टाकण्यास सुरुवात केली तेव्हा हाणामारी सुरू झाली. सरकार समर्थकांनी आंदोलकांवर हल्ला केल्यानंतर उलट हिंसाचार सुरू झाला. कोलंबोमध्ये झालेल्या या संघर्षात १३८ जण जखमी झाले होते. त्यांना कोलंबो नॅशनल हॉस्पिटलमध्ये दाखल करण्यात आले आहे. राष्ट्रपती गोटाबाया राजपक्षे मोठ्या शहरांमध्ये सैन्य तैनात करू शकतात, असे मानले जात आहे.