जळगाव लाईव्ह न्यूज । २२ जानेवारी २०२१ । विविध मागण्यांसाठी एसटी कर्मचारी गेल्या अडीच महिन्यापासून संपावर असून यात काही कामावर परतलेल्या मोजक्या कामगारांच्या बळावर सेवा सुरू करण्याच्या राज्य सरकारच्या प्रयत्नात अडथळे आणले जात आहेत. जळगावात एकाच ठिकाणी आज दोन एसटी बसेसवर दगडफेक करण्यात आल्याची घटना घडली आहे. दुपारी पावणे एकच्या सुमारास हा प्रकार घडला असून यात गाड्याचे नुकसान झाले असून एक चालक जखमी झाला आहे.
जळगाव-धुळे या मार्गावर विचखेडा या गावाजवळून एसटी बस (क्रमांक एम एच २० बी.एल. ४०९७) जात असताना मोटरसायकल क्रमांक ०७८५ वरील दोन व्यक्तींपैकी मागे बसलेल्या व्यक्तीने सदर बसवर दगड फेकून मारला. या दगडफेकीत बसची समोरील काच फुटून चालक संजय गोविंद रंधे (चालक क्रमांक २८८०) यांना दुखापत झाली आहे.
या घटनेनंतर काही वेळातच याच ठिकाणी धुळ्याहून जळगावला निघालेल्या दुसऱ्या बसवर (क्रमांक एम एच २० ३३८१) याच लोकांनी दगडफेक केली. या दगडफेकीत बसची काच फुटली. बस चालक सोपान सपकाळे (क्रमांक १३५८) यांनी प्रसंगावधान राखून बसवर नियंत्रण मिळवल्याने मोठा अपघात टळला.
या संदर्भात पारोळा पोलीस ठाण्यामध्ये संशयित दुचाकीस्वारांविरोधात गुन्हे दाखल करण्यात आलेले आहेत. पुढील तपास सहाय्यक पोलीस निरीक्षक बापूराव पाटील करीत आहेत.
हे देखील वाचा :
- रूद्राक्ष टीमचे कुटुंब नियोजन पथनाट्य ठरले प्रथम विजेते
- गोदावरी अभियांत्रिकीत उद्या स्वावलंबी भारत अभियानार्तंगत उद्यमिता संमेलन
- जळगावात दुध व दुग्धजन्य अन्नपदार्थाचा मुदतबाह्य साठा नष्ट ; अन्न व औषध प्रशासनाची धडक कारवाई
- जळगावात मांजा विक्रीसह वापर करणाऱ्यांवर पोलिसांची कारवाई; ८ जण ताब्यात
- महाराष्ट्रातील या भागात पावसाचा अंदाज: शेतकऱ्यांना सावध राहण्याचा सल्ला..
