होळीआधी पुणे-नागपूरसह ‘या’ शहरांसाठी स्पेशल ट्रेन.. भुसावळ, जळगावातील प्रवाशांना दिलासा

जळगाव लाईव्ह न्यूज । होळीचा सण अवघ्या काही दिवसांवर येऊन ठेपला असून याच पार्श्वभूमीवर कामानिमित्त बाहेरगावी वास्तव्यास असलेले नागरिक मोठ्या संख्येने आपल्या गावी परततात. याकाळात रेल्वे गाड्यांमध्ये मोठी गर्दी दिसून येते. प्रवाशांची वाढती गर्दी लक्षात घेता नागपूरसह उत्तर भारतातील प्रमुख शहरांसाठी विशेष गाड्या धावणार आहेत. पुण्यातून दानापूर, गोरखपूर, नागपूर आणि हजरत निजामुद्दीन या मार्गांसाठी विशेष रेल्वे गाड्या चालविण्यात येणार आहेत. विशेष या गाड्या जळगाव आणि भुसावळ मार्गे धावणार असल्याने जिल्ह्यातील प्रवाशांना दिलासा मिळणार आहे.

गोरखपूर, दानापूर व नागपूरसाठी अतिरिक्त फेऱ्या

पुण्यातून गोरखपूर आणि दानापूरकडे जाणाऱ्या विशेष गाड्यांच्या अतिरिक्त फेऱ्या जाहीर करण्यात आल्या आहेत. पुणे–गोरखपूर मार्गावर 32 दैनिक विशेष फेऱ्या, पुणे–दानापूर मार्गावर 32 दैनिक विशेष फेऱ्या तसेच पुणे–दानापूर दरम्यान 8 द्वि-साप्ताहिक विशेष फेऱ्या चालविण्यात येणार आहेत.

पुणे-नागपूर प्रवास सोपा

पुणे–नागपूर साप्ताहिक विशेष गाडी क्रमांक 01461 ही 24 फेब्रुवारी आणि 3 मार्च रोजी दुपारी 1.50 वाजता पुण्यातून सुटेल. ही गाडी दुसऱ्या दिवशी सकाळी सुमारे 6.30 वाजता नागपूरला पोहोचेल. परतीच्या प्रवासासाठी गाडी क्रमांक 01478 ही 25 फेब्रुवारी आणि 4 मार्च रोजी सकाळी 8 वाजता नागपूरहून सुटेल आणि त्याच दिवशी रात्री सुमारे 11.30 वाजता पुण्यात दाखल होईल.

पुणे–गोरखपूर विशेष गाडी

पुणे–गोरखपूर मार्गावर विशेष गाडी क्रमांक 01415 ही 21 फेब्रुवारी ते 8 मार्चदरम्यान दररोज सकाळी 6.50 वाजता पुण्यातून सुटणार आहे. ही गाडी दुसऱ्या दिवशी दुपारी सुमारे 4 वाजता गोरखपूरला पोहोचेल. परतीसाठी गाडी क्रमांक 01416 ही 22 फेब्रुवारी ते 9 मार्चदरम्यान दररोज सायंकाळी 5.30 वाजता गोरखपूरहून निघेल. ही गाडी पुण्यात तिसऱ्या दिवशी पहाटे सुमारे 3.15 वाजता दाखल होईल.

पुणे–दानापूर विशेष गाडी

पुणे–दानापूर द्वि-साप्ताहिक गाडी क्रमांक 01449 ही 21 फेब्रुवारी ते 8 मार्चदरम्यान दुपारी 3.30 वाजता पुण्यातून सुटेल. ही गाडी दुसऱ्या दिवशी पहाटे सुमारे 2.45 वाजता दानापूरला पोहोचेल. परतीच्या प्रवासासाठी गाडी क्रमांक 01450 ही 23 फेब्रुवारी ते 10 मार्चदरम्यान सकाळी 5 वाजता दानापूरहून सुटेल. ही गाडी दुसऱ्या दिवशी सायंकाळी सुमारे 6.15 वाजता पुण्यात दाखल होईल.

पुणे–दानापूर द्वि-साप्ताहिक विशेष गाडी जाहीर

पुणे–दानापूर दरम्यान द्वि-साप्ताहिक विशेष गाडी क्रमांक 01481 ही 23 व 27 फेब्रुवारी तसेच 2 व 6 मार्च रोजी सायंकाळी 7.55 वाजता पुण्यातून सुटेल आणि तिसऱ्या दिवशी पहाटे 4.20 वाजता दानापूरला पोहोचेल. परतीसाठी गाडी क्रमांक 01482 ही 25 फेब्रुवारी तसेच 1, 4 व 8 मार्च रोजी सकाळी 8 वाजता दानापूरहून सुटून दुसऱ्या दिवशी सायंकाळी 6.15 वाजता पुण्यात दाखल होईल. या अतिरिक्त फेऱ्यांमुळे सणासुदीच्या काळात प्रवाशांना दिलासा मिळणार आहे.