जळगाव लाईव्ह न्यूज । १७ जून २०२५ । एरंडोल तालुक्यातील रिंगणगाव येथून बेपत्ता झालेल्या 13 वर्षीय मुलाचा गळा चिरलेला मृतदेह शेतात आढळून आला. तेजस गजानन महाजन असं मयत मुलाचे नाव असून या घटनेने परिसरात खळबळ उडाली आहे. दरम्यान तेजसच्या हत्या करण्यामागील कारण काय?याबाबत पोलीस तपास करत आहे.
या घटनेबाबत असं की, मयत तेजस हा रिंगणगाव येथे आई,वडील, मोठी बहीण यांच्यासह वास्तवास होता. तेजसचे वडील गजानन हे शेती काम करून हार्डवेअरचे दुकान चालवत उदरनिर्वाह करीत आहेत. दरम्यान सोमवार दि. १६ जून रोजी गजानन महाजन यांनी त्यांचा १३ वर्षीय मुलगा तेजस महाजन याला दुकानावर बसवून जळगावला कामानिमित्त निघून गेले होते. तर तेजस हा दुकान बंद करून घरी जाणे कुटुंबीयांना अपेक्षित होते. मात्र तेजस घरी आला नाही. सोमवारी गावाच्या बाजाराचा दिवस देखील होता. म्हणून शोधाशोध सुरू झाली. एरंडोल पोलीस स्टेशनला कुटुंबीयांनी तक्रार दाखल केली.
यानंतर पोलिसांनी निरीक्षक निलेश गायकवाड यांच्या मार्गदर्शनाखाली तपासचक्र फिरवीत तेजसचा शोध रात्रभर सुरू ठेवला होता. अखेर मंगळवारी सकाळी ८ वाजेच्या सुमारास एरंडोल तालुक्यातील खर्ची गावाजवळ निंबाळकर यांच्या शेतामध्ये १३ वर्षीय मुलाचा मृतदेह गळा चिरलेल्या अवस्थेत असल्याची माहिती एरंडोल पोलिसांना काही ग्रामस्थांनी दिली. पोलिसांनी घटनास्थळी जाऊन खात्री केली असता मृतदेह तेजस महाजन याचाच असल्याचे स्पष्ट झाले. या घटनेमुळे कुटुंबीयांना जबर धक्का बसला आहे. घटनास्थळी मोबाईल फॉरेनसिक व्हॅन दाखल झाली असून तपास सुरू झाला आहे. दरम्यान बालकाची हत्या करण्यामागील कारण काय याबाबतचा तपास पोलीस करत असून काही इसमांची संशयित म्हणून धरपकड केली असल्याची माहिती मिळत आहे.
