जळगाव लाईव्ह न्यूज । १५ जानेवारी २०२६ । जळगाव महानगरपालिकेच्या सार्वत्रिक निवडणुकीसाठी आज सकाळी ७:३० वाजेपासून मतदान प्रक्रियेला सुरुवात झाली असून या लोकशाहीच्या उत्सवात शहराचे आमदार राजूमामा भोळे यांनी सकाळीच सहपरिवार मतदानाचा हक्क बजावला आहे. यावेळी त्यांनी शहराच्या सर्वांगीण विकासासाठी आणि उज्ज्वल भविष्यासाठी नागरिकांनी घराबाहेर पडून मोठ्या संख्येने मतदान करावे, असं आवाहन केलं आहे.
शहरातील प्रभाग क्रमांक ७ अंतर्गत असलेल्या रोझलँड इंग्लिश मीडियम स्कूलमधील मतदान केंद्रावर जाऊन आपले मत नोंदवले.यावेळी आमदार भोळे यांच्यासोबत माजी महापौर सीमाताई भोळे, महायुतीकडून बिनविरोध निश्चित झालेले उमेदवार विशाल भोळे तसेच त्यांच्या कुटुंबातील सदस्य उपस्थित होते.
यानंतर पत्रकारांशी संवाद साधताना त्यांनी जळगाव महापालिकेवर महायुतीचाच महापौर होणार असं जनतेनं ठरवलं आहे असं म्हणत जळगाव महापालिकेत महायुतीच्या 70 जागा येतील असा विश्वास आमदार राजूमामा भोळे यांनी व्यक्त केला आहे.
दरम्यान शहरातील विविध मतदान केंद्रांवर सकाळपासूनच मतदारांच्या लांबच लांब रांगा पाहायला मिळत असून सकाळच्या टप्प्यात मतदानाचा वेग समाधानकारक असून दुपारपर्यंत यात अधिक वाढ होण्याची शक्यता वर्तवण्यात येत आहे.
