जळगाव लाईव्ह न्यूज । ११ मार्च २०२१ । जळगाव शहरात एक धक्कादायक घटना उघडकीस आलीय. विष प्राशन करून पिता-पुत्राने आत्महत्या केल्याची घटना आज जळगावातील आदर्शनगरमध्ये घडलीय. दीपक रतीलाल सोनार (वय ६२) व परेश दीपक सोनार (वय ३४) असे आत्महत्या केलेल्या पिता-पुत्राचे नाव आहे.
आदर्श नगरात दीपक सोनार हे आपल्या कुटुंबासह वास्तव्यास असून ते गत दोन दिवसांपासून त्यांची पत्नी कोरोना बाधीत झाल्यामुळे त्यांच्यावर एका खासगी रूग्णालयात उपचार सुरू आहेत. आज दुपारी दीपक सोनार यांची मुलगी व जावई त्यांना भेटण्यासाठी आले होते. त्यांनी उपचार सुरू असणार्या आईची विचारपूस केली. यानंतर सायंकाळी मुलगी पुन्हा त्यांना भेटण्यासाठी आली असता दीपक सोनार व त्यांचा मुलगा परेश यांचे मृतदेह त्यांना आढळून आले.
त्यांना तातडीने जिल्हा रूग्णालयात आणले असता विष प्राशन केल्यामुळे या दोघांचा मृत्यू झाल्याची प्राथमिक माहिती समोर आली. या संदर्भात शेवटचे वृत्त हाती आले तेव्हा पोलीसांनी पंचनामा करून गुन्हा नोंदविण्याची प्रक्रिया सुरू केली होती.
