जळगाव लाईव्ह न्यूज । ११ मे २०२१ । पाचोरा तालुक्यातील नगरदेवळा येथील ६० वर्षीय महिलेला कोरोनाबाधित झाल्यानंतर श्वास घ्यायला त्रास होत होता. चिंताजनक अवस्थेत त्यांना दाखल केल्यावर पुढील १० दिवस औषधोपचार झाल्यानंतर त्या पूर्ण बऱ्या झाल्या. सोमवारी १० मे रोजी त्यांच्या मुलांनी डिस्चार्ज घेताना चक्क हार घालूनच आईचे स्वागत करीत घरी नेले. हि सुखावह घटना घडली, जळगावच्या शासकीय वैद्यकीय महाविद्यालय व रुग्णालयात.

नगरदेवळा येथील शेतकरी कुटुंबातील पाटील परिवारातील महिलेचा कोरोना अहवाल पॉझिटिव्ह आल्यानंतर त्यांना ताप येणे, अशक्तपणा अशी लक्षणे जाणवायला लागली. तसेच, ऑक्सिजन घेण्यास त्रास व्हायला लागला. त्यांना तातडीने शासकीय वैद्यकीय महाविद्यालय व रुग्णालय, जळगावात ३० एप्रिल रोजी दाखल करण्यात आले. त्यावेळी त्यांचा ऑक्सिजन ७० ते ७२ दाखवीत होता. त्यांचा एचआरसिटी स्कोअर हा २० होता. त्यांना त्वरित ऑक्सिजन मास्क लावून औषधोपचार सुरु करण्यात आले.

अखेर १० व्या दिवशी वैद्यकीय पथकाच्या मार्गदर्शनाखाली कोरोनावर मात करून या महिला पूर्ण बऱ्या झाल्या. सोमवारी त्यांना वॉर्ड क्रमांक ९ मधून डिस्चार्ज देण्यात आला. रविवारी ९ रोजीच ‘मदर डे’ साजरा झाला. त्याच्याच दुसऱ्या दिवशी महिलेच्या मुलांनी आईसाठी फुलांचा हार आणून गळ्यात टाकीत स्वागत करीत घरी नेले. यावेळी डॉ. संजय धुमाळे, वॉर्ड इन्चार्ज अधिपरिचारिका शैला शिंदे, अधिपरिचारिका नसरीन शेख उपस्थित होते. येताना स्ट्रेचरवर अत्यवस्थ स्थितीत आलेली आई जाताना स्वतःच्या पायाने चालत घरी गेली म्हणून मुलांनी वैद्यकीय यंत्रणेचे आभार मानले. ६० वर्षांची आमची आई घरी परत येईल अशी आम्हाला खात्री वाटत नव्हती. तुम्ही आमच्यासाठी देव आहात, अशी प्रतिक्रिया मुलांनी डॉक्टरांकडे व्यक्त केली.

“कोरोनाबाधित झाल्यावर रुग्ण अत्यवस्थ होत असेल आणि त्याला वेळेत उपचाराकरिता शासकीय वैद्यकीय महाविद्यालय व रुग्णालयात उपचारासाठी आणले तर नक्कीच तो  बरा होऊ शकतो. कुठलीही भीती न बाळगता, निःसंकोच रुग्णालयात रुग्णांनी दाखल व्हावे.”

– डॉ. जयप्रकाश रामानंद, अधिष्ठाता
शासकीय वैद्यकीय महाविद्यालय व रुग्णालय, जळगाव.

जळगाव लाईव्ह न्यूज । ११ मे २०२१ । कोवीड-19 च्या काळात समाजात अल्पवयीन बालकांच्या समस्या अधिक गुंतागुंतीच्या बनत आहेत. कोरोना कालावधीत इतर समस्यांसोबत भेडसावणारी महत्वपूर्ण समस्या बालविवाह असून सततचे लॉकडाऊन, बंद व बेरोजगारी यामुळे बाल विवाहाचे प्रमाण वाढत आहे.

भारतीय संस्कृतीत विवाह ही समाजातील महत्वाची आणि सार्वत्रिक सामजिक क्रिया आहे. सहाजिकच शुभमुहूर्तावर विवाह विधी केल्या जातात. अक्षयतृतीया हा महत्वाचा मुहूर्त असल्याने या शुभ मुहुर्तावर सामुदायिक तसेच एकल विवाह समारंभ आयोजित केले जातात. यामध्ये बाल विवाहाचे प्रमाण मोठया प्रमाणात असण्याची शक्यता नाकरण्यात येत नाही. त्यामुळे अक्षयतृतीयेच्या मुहुर्तावर होणारे बाल विवाह रोखण्यासंदर्भात केंद्र व राज्य शासनाकडून निर्देश प्राप्त झालेले आहे.

बाल विवाह ही प्रथा बाल हक्कांच्या विरोधी असून बाल विवाह प्रतिबंध अधिनियम 2006 नुसार असे विवाह बेकायदा ठरतात. या विरोधात गुन्हा नोंदविला जाणे अपेक्षित आहे. या कायद्याच्या अमंलबजावणीसंदर्भात ग्रामीण भागासाठी ग्रामसेवक आणि शहरी भागासाठी बाल विकास प्रकल्प अधिकारी नियुक्त करण्यात आले आहे. त्यामुळे बाल विवाह आणि बाल हक्कांच्या संरक्षणासाठी अधिक सक्षमपणे प्रयत्न होणे आवश्यक आहे. असल्याचे जिल्हाधिकारी अभिजीत राऊत यांनी प्रसिध्दी पत्रकात म्हटले आहे.

बाल विवाह हेाऊ नये यासाठी तात्काळ प्रतिबंधात्मक उपाय योजना होणे आवश्यक आहे. असे विवाह होत असल्याचे लक्षात आल्यास त्यावर तातडीने संबंधित यंत्रेणेने आवश्यक कायदेशीर कार्यवाही करावी.  अक्षय तृतीयेच्या महुर्तावर जिल्ह्यात बाल विवाह होणार नाहीत याची जबाबदारी प्रत्येक व्यक्तीने घेणे गरजेचे आहे व कोठेही बाल विवाह होत असल्यास ग्रामीण भागासाठी संबंधित ग्रामसेवक आणि शहरी  भागासाठी सबंधित बाल विकास प्रकल्प अधिकारी हे बाल विवाह प्रतिबंध अधिकारी म्हणून नियुक्त करण्यात आलेले आहे. तसेच जिल्हास्तरावर बाल कल्याण समिती, जिल महिला व बाल विकास अधिकारी, जिल्हा बाल संरक्षण अधिकारी, पोलीस विभाग, चाईल्ड लाईन (1098) , पोलीस पाटील व अंगणवाडी सेविका तसेच प्रत्येक महसुली गावातील गाव बाल संरक्षण समिती यांचेशी संपर्क साधावा. असे आवाहनही जिल्हाधिकरी श्री. राऊत यांनी केले आहे.

जळगाव लाईव्ह न्यूज । ११ मे २०२१ । रमजान पर्व अंतिम चरणात असून गुरुवारी किंवा शुक्रवारी चंद्रदर्शन झाल्यावर रमजान ईद साजरी होईल परंतु कडक निर्बंध असल्या कारणामुळे मुस्लिम धर्मीयांची ईद मागील दोन वर्षापासून साजरी होत नसल्याने आज जळगाव जिल्हा मुस्लिम इदगाह व कब्रस्तान ट्रस्टचे अध्यक्ष गफ्फार मलिक व जनरल सेक्रेटरी फारुक शेख यांनी जिल्हाधिकारी अभिजीत राऊत यांची दुपारी दोन वाजता भेट घेऊन त्यांना निवेदन दिले.

कपडा-ड्राय फ्रुट-फळ- धान्य- फेरीवाले यांना विशेष सूट द्या

११ ते १४ या तीन दिवसासाठी बाजाराच्या वेळेत विशेष सवलत देऊन त्यात प्रामुख्याने लहान मुलांचे रेडिमेट कपडे ,त्यांना लागणारी खेळणी व इतर साहित्य तसेच शीर-खुर्मा साठी लागणारे वेगवेगळे ड्रायफ्रुट्स, फितरा साठी धान्य व उपास सोडण्यासाठी आवश्यक ते फळे व भाजीपाला यांची दुकाने दुपारी दहा ते बारा किंवा संध्याकाळी चार ते सहा या वेळेत विशेष बाब म्हणून उघडण्याची परवानगी द्यावी  तसेच  जिल्हा दंडाधिकारी लातूर यांनी ज्याप्रमाणे आदेश पारित केले त्याच धर्तीवर शासनाच्या नियमावलीच्या अधीन राहून काही कडक नियम शितील करू परवानगी द्यावी अशी मागणी करण्यात आलेली आहे.

माननीय अभिजीत राऊत यांनी सदर प्रकरणी सकारात्मक धोरण अवलंबून काहीतरी प्रमाणात ढिल देता येईल का ते तपासून त्वरित  आदेश करतो असे आश्वासन दिले आहे.

जळगाव लाईव्ह न्यूज । ११ मे २०२१ । आगामी मान्सुन कालावधीत जिल्ह्यात आपत्तीजन्य परिस्थिती उद्भवल्यास सर्व यंत्रणांनी आपआपसात समन्वय ठेवून परिस्थिती हाताळण्यासाठी सज्ज रहावे, असे आवाहन अभिजीत राऊत, जिल्हाधिकारी तथा अध्यक्ष, जिल्हा आपत्ती व्यवस्थापन प्राधिकरण, जळगाव यांनी केले आहे.

येथील जिल्हाधिकारी कार्यालयातील सभागृहात मान्सून पूर्व आढावा बैठक जिल्हाधिकारी श्री. राऊत यांच्या अध्यक्षतेखाली दूरदृश्यप्रणालीद्वारे संपन्न झाली, यावेळी ते बोलत होते. याप्रसंगी निवासी उपजिल्हाधिकारी राहूल पाटील, जिल्हा आपत्ती व्यवस्थापन अधिकारी नरविरसिंह रावळ हे उपस्थित होते. तर जिल्ह्यातील सर्व प्रांताधिकारी, तहसीलदार, गटविकास अधिकारी यांचेसह विविध विभागांचे अधिकारी दूरदृश्यप्रणालीद्वारे या बैठकीत सहभागी झाले होते.

जिल्हाधिकारी श्री. राऊत पुढे म्हणाले की, महसुल विभागाने आपत्ती व्यवस्थापन आराखडा तयार करावा, शोध व बचाव साहित्याची तपासणी करुन सर्व साहित्य सुस्थितीत ठेवावे, मान्सुनकाळात आपत्ती प्रवणक्षेत्रात पुरेसा धान्यसाठा व वितरण करण्याचे नियोजन करावे. अंत्योदय योजनेतंर्गत लाभार्थ्यांना मान्सुन काळात धान्य पुरवठ्याचे नियोजन करावे. आरोग्य विभागाने पावसाळ्यात उद्भवणाऱ्या साथीच्या रोगांबाबत पुरेसा औषधसाठा करुन ठेवावा. आवश्यक औषधसाठ्याची मागणी नोंदवावी, जलजन्य व किटकजन्य आजार होवू नयेत याबाबत दक्षता घ्यावी. पाटबंधारे विभागाने धरणनिहाय आपत्ती व्यवस्थापन आराखडा तयार करुन पुररेषा निश्चित करावी. धरणातून विसर्ग सुरु करणार असल्यास त्याबाबतची माहिती दवंडी, सायरण यंत्रणेद्वारे द्यावी, हवामान खात्याकडून येणारे संदेश शेतकऱ्यांना वेळेत पोहोचविण्याचे काम कृषि विभागाने करावे. बांधकाम विभागाने रस्त्यांवरील पुल, पडणारी झाडे तसेच पाझरतलाव यांची पाहणी करुन घ्यावी तर नगरपालिकांनी आपल्याकडील अग्निशमन यंत्रणा सज्ज ठेवावी, वीज वितरण कंपनीने लोंबकळणाऱ्या तारा, उघडे ट्रान्सफार्मर, धोकेदायक पोल यांची दुरुस्ती करावी. आपत्तीच्या काळात कोणीही पूर्व परवानगीशिवाय मुख्यालय सोडणार नाही याची सर्व संबधित विभागांनी दक्षता घेण्याचे निर्देशही जिल्हाधिकाऱ्यांनी सर्वाना दिलेत.