जळगाव लाईव्ह न्यूज । १७ मे २०२१ । प्रधानमंत्री किसान सन्मान निधि योजना (PMKISAN) अंतर्गत देशातील 9.50 कोटी लाभार्थी शेतकऱ्यांना आठव्या हप्त्यातील (एप्रिल, 21 ते जुलै, 21) रूपये 19 हजार कोटीहून अधिक रक्कम लाभार्थी शेतकऱ्यांच्या बँक खात्यात हस्तांतरणाचा कार्यक्रम दिल्ली येथून 14 मे, 2021 रोजी प्रधानमंत्री यांच्या हस्ते ऑनलाइन पार पडला आहे.

हस्तांतरित केलेली रक्कम शेतकऱ्यांना खरीप हंगामात बियाणे, खते, औषधे सारख्या कृषी निविष्ठा खरेदी करण्यासाठी उपयुक्त ठरणार आहे. माहे फेब्रुवारी 2019 मध्ये प्रधानमंत्री किसान सन्मान निधी योजना सुरू झाल्यापासून देशातील 10 कोटीहून अधिक शेतकऱ्यांना आत्तापर्यंत रूपये 1.15 लाख कोटीहून अधिक रकमेचा लाभ देण्यात आला आहे. असे धीरजकुमार, आयुक्त, कृषि, महाराष्ट्र राज्य, पुणे यांनी कळविले आहे.

महाराष्ट्र राज्यात या योजने अंतर्गत सुरुवातीपासून दिनांक 13 मे, 2021 अखेर 105.30 लाख लाभार्थी शेतकऱ्यांना एकूण रु. 11 हजार 694 कोटी रकमेचा लाभ हस्तांतरित झाला आहे. तसेच 14 मे, 2021 रोजीच्या कार्यक्रमात दिनांक 1 एप्रील, 2021 ते दिनांक 31 जुलै, 2021 या कालावधीकरिता देय आठव्या हप्त्यामध्ये महाराष्ट्र राज्यातील एकुण 95.91 लाख पात्र लाभार्थी शेतकऱ्यांना साधारण रूपये 1 हजार 918 कोटीचा लाभ थेट त्यांच्या बँक खात्यात हस्तांतरित केला गेला.

चालू वर्षी भारतीय हवामान विभागाने सरासरीच्या 98 टक्के पाऊस पडण्याचे अनुमान जाहीर केले आहे. पाऊस वेळेवर सुरू होऊन जूनमध्ये पेरणीच्या दृष्टीने हा लाभ खरीप 2021 हंगामात विविध कृषी निविष्ठा खरेदीसाठी शेतकऱ्यांना उपयुक्त ठरणार असून यामुळे कृषी उत्पादन वाढीला चालना मिळणार असल्याचे धीरजकुमार, आयुक्त, कृषि तथा राज्यस्तरीय अंमलबजावणी प्रमुख पीएम किसान, कृषि आयुक्तालय, महाराष्ट्र राज्य, पुणे यांनी प्रसिध्दी पत्रकान्वये कळविले आहे.

जळगाव लाईव्ह न्यूज । १७ मे २०२१ । सध्या कोरोना महामारीच्या पार्श्वभूमीवर शेतकऱ्यांना कोणत्या पिकाची पेरणी करावी याबाबत संभ्रमावस्था आहे. ते ज्या पिकांची पेरणी करतात त्यातून उत्पादन होणाऱ्या बियाण्यास बाजारामध्ये योग्य भाव मिळेलच असेही नाही. परंतु महाबीजचे विविध पिकांच्या गुणवत्तापूर्ण पायाभुत बियाण्यापासून उत्पन्नात वाढ होते.

सदरील बिजोत्पादनातून उत्पादीत कच्चे बियाणे महामंडळाकडे जमा केल्याबरोबर 80 टक्के बाजारभावाएवढे पैसे बिजोत्पादकास त्वरीत मिळतात व त्यानंतर प्रक्रिया झालेल्या बियाण्यास बाजारभावापेक्षा 20 टक्के जास्त भाव मिळतो. तसेच बिजोत्पादन कार्यक्रमात सहभागी शेतकऱ्यांना बिज प्रक्रियेसाठी वाजवी दरात जैविक खते व बुरशीनाशके उपलब्ध करुन देण्यात येतात. त्यामुळे सुध्दा शेतकऱ्यांचे उत्पन्न वाढीस मदत होते.

बिजोत्पादन कार्यक्रमाची आगावू नोंदणी दि. 20 मे, 2021 पर्यंत जिल्हा कार्यालय, महाबीज, जळगाव, धुळे, नंदुरबार व नाशिक येथे करावी. या बिजोत्पादनामध्ये ज्युट, सु. ज्वारी, तूर, मुंग, उडीद, धान, सोयाबीन इत्यादी पिकांचे बिजोत्पादन घेतले जाते. शेतकरी बंधुनी जिल्हा कार्यालयास त्वरीत संपर्क साधावा व सदरील बिजोत्पादन कार्यक्रमात जास्तीत जास्त शेतकऱ्यांनी सहभाग घ्यावा. असे आवाहन महाबीजचे विभागीय व्यवस्थापक श्री. साईप्रकाश नवोड यांनी प्रसिध्दी पत्रकान्वये केले आहे.

जळगाव लाईव्ह न्यूज । १७ मे २०२१ । पेट्रोल डीझेल आणि रासायनिक खतांच्या दरवाढीचा आज सोमवारी यावल येथे राष्ट्रवादीतर्फे निषेध व्यक्त करत निवासी नायब तहसीलदार आर.के.पवार यांना निवेदन देण्यात आले.  यावेळी राष्ट्रवादी युवक काँग्रेसचे तालुकाध्यक्ष ॲड.देवकांत पाटील, यावल शहराध्यक्ष हितेंद्र गजरे, कार्याध्यक्ष नरेंद्र शिंदे, समन्वयक  किशोर माळी, शहर उपाअध्यक्ष वीरेंद्रशिंह सिसोदिया, सचिव भूषण खैरे, तालुका संघटक भूषण नेमाडे, सद्दाम शेख आदी उपस्थित होते.

काय म्हटलं आहे निवेदनात

रासायनिक खतांच्या किंमतीत जी दरवाढ झाली आहे, ती कमी करावी. देशात झालेल्या पेट्रोल व डिझेल दरवाढ कमी करण्यात यावी. यासाठी आम्ही राष्ट्रवादी युवक काँग्रेसच्या वतीने केंद्रातीलभाजपा सरकारचा जाहीर निषेध नोंदवत आहोत. यंदाच्या खरीप हंगामासाठी सर्कत्र शेतकरी बांधवांकडुन पेरणीपूर्व शेतमशागतीच्या कामांना गती देण्यात आली आहे. पेरणीसाठी लागणाऱ्या बी- बियाणे, खतांसाठीच्या आर्थिक बाबींची जुळवाजुळव करण्यासाठी शेतकऱ्यांकडून तयारी केली जात आहे. परंतु केंद्रशासनाकडून रासायनिक खतांवरील सबसिडी कमी केल्यामुळे खत उत्पादक कंपन्यांनी रासायनिक खतांच्या किंमतीत मोठी भाववाढ केली आहे. यासाठी केंद्राकडे पाठपुरावा करून खतांच्या वाढीव किंमती कमी करण्यात याव्यात व येत्या खरीप हंगामासाठी शेतकऱ्यांना उच्च उगवण क्षमता असणारे बियाणे रास्त भावात उपलब्ध करून देण्यात यावे.

तसेच गेल्या वर्षांपासून कोरोना प्रादूर्भाव त्याचप्रमाणे खरीप हंगामात सरासरी पर्जन्यमान होऊन ही उत्पादनात घट आली आहे. शिवाय शेत मालाला योग्य भाव न मिळल्यामुळे शेतकरी बांधवांची आर्थिक घडी विस्कळीत झाली आहे. केमिकल व फर्टिलायझरचे केंद्रीय मंत्री मनसुख मंडविया यांनी रासायनिक खतांच्या किंमतीत कोणतीही वाढ होणार नाही, असे सर्व खत कंपन्याच्या बैठकीत निर्णय झाला असल्याचे सांगितले होते. परंतु यंदाचा खरीप हंगाम तोंडावर असतांनाच खत कंपन्यांनी अचानक खतांच्या किंमतीत मोठी दरवाढ केली असून बियाण्यांच्या किंमतीत वाढ झाली आहे. यामुळे खते व बियाण्यांच्या विक्रीत, किंमतीत, पुरवठ्यात मोठा काळा बाजार होऊ नये, यासाठी या लिंकिंगवर नियंत्रण ठेवण्यासाठी जिल्हा आणि तालुका स्तरावर विशेष पथकाची नेमणूक करावी.

त्याचप्रमाणे देशात झालेल्या पेट्रोल व डिझेल दरवाढ ही सुद्धा कमी करण्यात यावी. अशी मागणी राष्ट्रवादी युवक काँग्रेस च्या वतीने देण्यात आलेल्या निवेदनाद्वारे  करण्यात आली आहे.

जळगाव लाईव्ह न्यूज । १७ मे २०२१ । कोरोना महामारीच्या पार्श्वभूमीवर राज्य शासनाच्या दि. 29 एप्रिल, 2021 च्या आदेशान्वये फक्त अत्यावश्यक सेवेकरीता ऑटोरिक्षामधून कमाल 2 प्रवासी वाहतूकीची परवानगी देण्यात आलेली आहे. जिल्ह्यातील कोरोना संसर्गावर परिणामकारकरित्या प्रभावी पध्दतीने आळा घालण्याकरीता या नियमांचे काटेकोरपणे पालन करण्याची जबाबदारी सर्व ऑटोरिक्षा चालकांची तसेच प्रवाशांची सुध्दा आहे.

जिल्ह्यात कोरोनाचा वाढता प्रादुर्भाव व प्रसार पूर्णपणे रोखणे अत्यावश्यक आहे. याकरीता जिल्हा प्रशासन यांचेकडून विविध मोहिमा व बंधने घालण्यात येत आहेत. त्याचाच एक भाग म्हणून सर्व ऑटोरिक्षा चालकांनी ऑटोरिक्षांमधील प्रवासी व चालक यांच्यात संपर्क होवू नये, याकरीता त्यांचे ऑटोरिक्षांमध्ये चालक केबीन व प्रवाशांना बसण्याची जागा या दरम्यान फायबर/प्लास्टीकचे अथवा इतर पारदर्शक पडद्याने विभाजन करावे जेणेकरुन होणारा संसर्ग टाळता येईल.

जिल्ह्यातील सर्व ऑटोरिक्षा चालकांनी याप्रमाणे त्यांच्या ऑटोरिक्षामध्ये सुधारणा करुनच प्रवासी वाहतूक करावी. जे ऑटोरिक्षाधारक या सुचनांचे पालन करणार नाहीत, अशा ऑटोरिक्षाचालकांविरुध्द दि. 16 मे, 2021 पासून मोटार वाहन कायदा 1988, आपत्ती व्यवस्थापन कायदा, 2005 व भारतीय दंड संहिता अधिनियमातंर्गत कारवाई करण्यात येईल, याची सर्व ऑटोरिक्षाचालकांनी नोंद घ्यावी. असे श्याम लोही, उप प्रादेशिक परिवहन अधिकारी, जळगाव यांनी एका प्रसिध्दी पत्रकान्वये कळविले आहे.