जळगाव लाईव्ह न्यूज । १८ मे २०२१ । शहरात फिरून दुचाकी चोरी करणारी गॅंग स्थानिक गुन्हे शाखेने उघडकीस आणली असून बांडुक गॅंगचा म्होरक्या शुभम शिवराम मिस्त्ररी यास त्याच्या साथीदारासह अटक करण्यात आली आहे. एलसीबीच्या पथकाने त्यांच्याकडून चोरीच्या तीन दुचाकी हस्तगत केल्या आहे.

शनीपेठ पोलीस ठाण्याच्या हद्दीत दुचाकींची चोरी बांडुक गँगचा प्रमुख शुभम मिस्तरी हा करत असल्याची माहिती स्थानिक गुन्हे शाखेच्या पथकाला मिळाली. त्यानुसार पोलिसांनी कलावसंत नगर येथे रेल्वेगेट कडे जाणाऱ्या रोडवर संशयित आरोपी शुभम मिस्तरी आणि राहुल रविंद्र कोळी (वय-१९) रा. मेस्कोमाता नगर यांना ताब्यात घेतले. दरम्यान त्यांच्या ताब्यातील दोन चोरीच्या दुचाकी हस्तगत केली आहे. तर तिसरी दुचाकी शुभमच्या राहत्या घरातून हस्तगत केली आहे. तीनही दुचाकी ह्या शनीपेठ हद्दीतून चोरी केल्याचे निष्पन्न झाले आहे. दोघांना शनीपेठ पोलीसांच्या ताब्यात देण्यात आले आहे.

यांनी केली कारवाई

स्थानिक गुन्हे शाखेचे पोलीस निरीक्षक किरणकुमार बकाले यांनी सहाय्यक फौजदार अशोक महाजन, पोहेकॉ विजयसिंग पाटील, जितेंद्र पाटील, सुधाकर आंभोरे, अश्रु शेख, नितीन बाविस्कर, प्रितम पाटील, राहूल पाटील, वसंत लिंगायत, उमेशगिरी गोसावी यांनी ही कारवाई केली.

जळगाव लाईव्ह न्यूज । १८ मे २०२१ । काँग्रेसच्या प्रदेश कार्याध्यक्षा आ. प्रणिती शिंदे यांच्या उपस्थितीत जळगावात येथील अजिंठा विश्रामगृहात पक्षाची बैठक पार पडली. पदाधिकारी आणि कार्यकर्ते यांची मोठ्या प्रमाणात गर्दी उसळली होती. यामुळे कोरोना नियमांचे उल्लंघन केल्याप्रकरणी रामानंदनगर पोलीस स्थानकात २० ते २५ नेते, पदाधिकारी आणि कार्यकर्ते यांच्यावर गुन्हे दाखल करण्यात आले.

काँग्रेस पक्षाच्या आमदार प्रणिती शिंदे १५ मे रोजी जळगाव जिल्हा दौऱ्यावर होत्या. त्यांच्या उपस्थितीत अजिंठा शासकीय विश्रामगृहावर दुपारी एक ते सायंकाळी पाच या कालावधीत पक्षाचे पदाधिकारी व महत्वाच्या  कार्यकर्त्यांची बैठक घेण्यात आली. या बैठकीचे आयोजन पक्षाचे जिल्हाध्यक्ष अॅड संदीप पाटील व इतर पदाधिकाऱ्यांनी केले होते. बैठक घेण्यापूर्वी पक्षाने पोलीस व जिल्हा प्रशासनाची कोणतीही परवानगी घेतलेली नव्हती. तसेच कोरोनाच्या पार्श्वभूमीवर सोशल डिस्टंसिंगचा अभाव होता, तर काही जण विना मास्क होते. कोरोनाचा संसर्ग पसरविण्यास ही कृती कारणीभूत ठरली. जिल्हाधिकाऱ्यांनी लागू केलेल्या सर्वच नियमांचे उल्लंघन या बैठकीत करण्यात आले होते.

याची दखल घेत आज नियमांचे उल्लंघन करून बैठक घेतल्या प्रकरणी आज मंगळवारी रामानंदनगर पोलीस स्थानकात काँग्रेसच्या स्थानिक नेत्यांविरूध्द कलम १८८ अंतर्गत गुन्हा दाखल करण्यात आला आहे. यात रावेरचे काँग्रेस आमदार शिरीष चौधरी, पक्षाचे जिल्हाध्यक्ष अॅड. संदीप पाटील, माजी खासदार डॉ.उल्हास पाटील, युवक जिल्हाध्यक्ष हितेश पाटील, महिला आघाडीच्या जिल्हाध्यक्ष सुलोचना वाघ, माजी अध्यक्ष उदय पाटील, जिल्हा परिषदेचे गटनेते प्रभाकर सोनवणे, श्याम तायडे यांच्यासह इतर २० ते २५ पदाधिकारी व कार्यकर्ते यांचा त्यात समावेश आहे.

जळगाव लाईव्ह न्यूज । १८ मे २०२१ । भरधाव कारने दुचाकीला जोरदार धडक देऊन झालेल्या भीषण अपघातात कडगाव येथील तीन जणांचा मृत्यू झाल्याची घटना महाराष्ट्र-गुजराच्या सीमेजवळ असलेल्या डोडवा फाट्याजवळ घडलीय. या अपघात १० वर्षातील २ मुलांचा समावेश आहे. याप्रकरणी अक्कलकुवा पोलीस ठाण्यात गुन्हा दाखल करण्यात आला आहे.

याबाबत असे की, अक्कलकुवापासून सुमारे १५ किलोमीटर अंतरावरील असलेल्या डोडवा फाट्याजवळ असलेल्या स्वागत हॉटेलसमोर गुजरात राज्यातील चिकालीकडून (ता.सागबारा जि.नर्मदा) महुपाडा गावाकडे येत असलेल्या मोटरसायकलला (क्र.एम.एच.१९ बी.बी.५३०४) भरधाव वेगाने येणाऱ्या कारने( क्र.एम एच ४३ बी.यु.८१६२) जबर धडक दिली. या अपघातात दुचाकीवरील असलेले मोहन कडू मोरे(वय २५), रोहित कैलास मोरे (वय १०), कुणाल एकनाथ मोरे (वय १०) हे तिघे ठार झाले असून मुक्ताबाई एकनाथ मोरे (वय ३५) या गंभीर जखमी झाल्या आहेत. चौघे जण जळगाव तालुक्यातील कडगाव येथील रहिवासी असून ते सध्या गुजरात राज्यातील नर्मदा जिल्ह्यातील चिकाली फाटा येथे वास्तव्यास होते.

अपघाताची माहिती मिळताच पोलीस निरीक्षक राजेश शिंगटे, पोलीस उपनिरीक्षक ज्ञानेश्­वर बडगुजर यांनी तात्काळ घटनास्थळी भेट देऊन पाहणी केली. खापर पोलीस दूरक्षेत्राच्या कर्मचाऱ्यांनी अपघातग्रस्तांना मदत केली. उपविभागीय पोलिस अधिकारी श्रीकांत घुमरे यांनीही घटनास्थळी भेट देऊन पाहणी केली. याबाबत अक्कलकुवा पोलीस ठाण्यात गुन्हा नोंदविण्यात आला असून पुढील तपास पोलिस उपनिरीक्षक ज्ञानेश्वर बडगुजर करीत आहेत.