जळगाव लाईव्ह न्यूज । २६ डिसेंबर २०२४ । महाराष्ट्र सरकारची लाडकी बहीण योजना महिलांसाठी एक महत्त्वाची आणि लाभदायक योजना ठरली आहे. या योजनेअंतर्गत महिलांना वर्षातून ३ घरगुती गॅस सिलिंडर मोफत मिळणार आहेत, ज्यामुळे त्यांच्या दैनंदिन जीवनात सुलभता निर्माण होणार आहे. त्यामुळे आता ज्या महिलांच्या नावावर गॅस कनेक्शन नाही त्यांना ते करुन घेण्याची सुवर्णसंधी आहे.
मोफत गॅस सिलिंडर
मुख्यमंत्री अन्नपूर्णा योजनेअंतर्गत महिलांना वर्षाला ३ गॅस सिलिंडर मोफत दिले जातात. ही योजना लाडकी बहीण योजनेचा एक महत्त्वाचा भाग आहे, ज्यामुळे महिलांना घरगुती गॅस सिलिंडरच्या खर्चातून मुक्ती मिळेल. ज्या महिलांच्या नावावर गॅस सिलिंडरचे कनेक्शन आहे, त्यांनाच या योजनेचा लाभ मिळणार आहे. अनेक पुरुषांच्या नावावर गॅस कनेक्शन असल्याने, या योजनेचा लाभ घेण्यासाठी महिला स्वतःच्या नावावर गॅस कनेक्शन घेऊ शकतात.
आर्थिक मदत
लाडकी बहीण योजनेअंतर्गत महिलांना दर महिन्याला १५०० रुपये देण्यात येतात. विधानसभा निवडणुकीदरम्यान महायुतीने या रकमेमध्ये वाढ करून २१०० रुपये करण्याची घोषणा केली होती, परंतु डिसेंबर महिन्यातील हप्ता अजूनही १५०० रुपयेच दिला जाणार आहे. २१०० रुपयांची तरतूद अर्थसंकल्पात होणार असल्याने, अर्थसंकल्प सादर झाल्यानंतरच महिलांना वाढीव रक्कम मिळण्याची शक्यता आहे.
अर्ज प्रक्रिया
महिला या योजनेचा लाभ घेण्यासाठी साध्या कागदावर अर्ज करू शकतात. त्यांना फक्त जवळच्या गॅस एजन्सीमध्ये जाऊन गॅस कनेक्शनवरील नाव बदलावे लागेल. यानंतर, महिलांना योजनेअंतर्गत मोफत गॅस सिलिंडर मिळणार आहेत. सुरुवातीला लाभार्थी महिलांना संपूर्ण पैसे द्यावे लागणार आहेत, त्यानंतर शासनाचे अनुदान त्यांच्या खात्यात जमा केले जाईल.
