जळगाव लाईव्ह न्यूज । पाचोरा शहरात जारगाव चौफुलीवर भरधाव मालमोटारीने धडक दिल्याने २६ वर्षीय तरूणाचा मृत्यू झाल्याची दुर्दैवी घटना मंगळवारी रात्री ११ वाजता घडली. सुनील उत्तम सोनार (२६), असे अपघातात मृत्यू झालेल्या तरूणाचे नाव असून याबाबत या प्रकरणी पोलिसांनी अकस्मात नोंद केली असून मालमोटार चालकाचा शोध घेतला जात आहे.
या घटनेबाबत असे की, पाचोरा शहरातील जारगाव चौफुलीवर चहाची टपरी चालवून सुनील सोनार हा कुटुंबाचा उदरनिर्वाह चालवत होता. सुनील नेहमी प्रमाणे मंगळवारी रात्री ११ वाजता टपरी बंद करून दुचाकीने घरी कृष्णापुरीकडे जाण्यास निघाला होता. त्याच वेळी चौफुलीजवळून जात असलेल्या एका मालमोटारीने त्याच्या दुचाकीला जोरदार धडक दिली. ज्यामुळे सुनील गंभीर जखमी झाला.
अपघातानंतर जखमी अवस्थेत त्याला तातडीने जळगाव येथील शासकीय वैद्यकीय महाविद्यालयात उपचारासाठी दाखल करण्यात आले. मात्र, रात्री १२.३० वाजता उपचार सुरू असतानाच त्याचा मृत्यू झाला. रुग्णालयात आज बुधवारी सकाळी उत्तरीय तपासणी करून मृतदेह नातेवाईकांना सोपविण्यात आला.अपघातानंतर घटनास्थळावरून मालमोटार चालक पसार झाला आहे. याप्रकरणी या प्रकरणी पोलिसांनी अकस्मात मृत्यू अशी नोंद घेतली असून फरार मालमोटार चालकाचा शोध जारगाव चौफुली परिसरातील सीसीटीव्ही कॅमेऱ्यांचे चित्रण तपासून केला जात आहे.
