जळगाव लाईव्ह न्यूज । ‘गुलाबी साडी, सुंदरी सुंदरी’ या जगप्रसिद्ध गाण्याच्या अभूतपूर्व यशानंतर, जळगावचा सुपुत्र आणि प्रसिद्ध गायक-रॅपर संजू राठोड (Sanju Rathod) याचे आणखी एक नवीन गाणे सध्या सोशल मीडियावर तुफान धुमाकूळ घालत आहे. संजूच्या ‘लाल लाल कलरची बांगडी’ (Bangles) या ताज्या गाण्याने अवघ्या दोन आठवड्यांतच डिजिटल प्लॅटफॉर्मवर करोडो व्ह्यूजचा टप्पा पार केला आहे.
जळगावच्या मातीतील कलाकाराची गगनभरारी
जळगाव (Jalgaon) जिल्ह्यातील धानवड तांडा या छोट्याशा खेड्यातून आलेल्या संजू राठोडने आपल्या संगीताच्या जोरावर आज सातासमुद्रापार ओळख निर्माण केली आहे. त्याने आपल्या गाण्यांमधील मराठमोळा बाज आणि गावरान लय कायम जपली आहे. ‘गुलाबी साडी’ने संपूर्ण जगाला ठेका धरायला लावल्यानंतर आता ‘लाल लाल कलरची बांगडी’ या गाण्यानेही रसिकांना अक्षरशः वेड लावले आहे.
त्याच्या या गाण्यांमधून ग्रामीण जीवनाचे वास्तव आणि सौंदर्य नेहमीच उठून दिसते. लाल लाल कलरची बांगडी’ या गाण्याचे चित्रीकरण अस्सल गाव-खेड्यात करण्यात आले आहे. कौलारू घरे, मातीचे रस्ते, गुरेढोरे आणि गावकऱ्यांचे दैनंदिन जीवन यामुळे या गाण्याला एक वेगळाच मराठमोळा स्पर्श मिळाला आहे. आधुनिक बीट्स आणि पारंपरिक वातावरण यांचा साधलेला सुरेख मेळ हे या गाण्याचे मोठे वैशिष्ट्य ठरले आहे.
हे गाणे प्रदर्शित होऊन अवघे दोन आठवडे झाले आहेत, पण अल्पावधीतच या गाण्याने सोशल मीडियावर धुमाकूळ घातला आहे: सोशल मीडियावरील मोठे इन्फ्लुएन्सर्स, डान्सर्स आणि सर्वसामान्य युजर्स या गाण्यावर हुकस्टेप्स करत रिल्स आणि व्हिडिओ बनवत आहेत. गाण्याचे ताल धरायला लावणारे संगीत आणि सोपे शब्द यामुळे हे गाणे प्रत्येकाच्या ओठावर रुळले आहे.
फक्त सोशल मीडियाच नाही, तर सध्या लग्नसमारंभ, कॉलेज फेस्टिव्हल्स, डीजे नाईट्स आणि विविध सांस्कृतिक कार्यक्रमांमध्ये ‘लाल लाल कलरची बांगडी’ हे गाणे मोठ्या उत्साहात वाजवले जात आहे. या गाण्याच्या तालावर तरुणाई थिरकताना दिसत आहे.एकंदरीत, संजू राठोडचे हे गाणे पुन्हा एकदा नवा विक्रम प्रस्थापित करण्याच्या मार्गावर असून, त्याच्या या यशाबद्दल संगीत क्षेत्रातून आणि चाहत्यांकडून त्याच्यावर कौतुकाचा वर्षाव होत आहे.
