जळगाव लाईव्ह न्यूज । राज्यात महिलासंह मुलींवर होणाऱ्या अत्याचाराच्या घटना काही केल्या कमी होताना दिसत नाहीय. अशातच पाचोरा तालुक्यातून नात्याला काळिमा फासणारी एक संतापजनक घटना समोर आलीय.
ज्यात मुंबईत पोलिस असलेल्या मावस काकाने अल्पवयीन पुतणीवर बलात्कार केला. यातून ती गर्भवती राहिली. हा प्रकार उघडकीस आल्यावर तिचा गर्भपातही करण्यात आला. संशयित काकाविरुध्द पाचोरा पोलिस ठाण्यात गुन्हा दाखल करण्यात आला असून गर्भपात करणारा डॉ. रवींद्र पाटील यास अटक झाली आहे.
मिळालेल्या माहितीनुसार तालुक्यातील एका गावात आजी-आजोबांसोबत राहणाऱ्या अल्पवयीन मुलीवर तिच्या मुंबई पोलिस असलेल्या मावस काकाने जून २०२५ मध्ये बलात्कार केला. याची वाच्यता केल्यास तुला पोलिस होऊ देणार नाही, अशी धमकी दिली. ऑक्टोबर महिन्यात त्या मुलीला उलट्या होऊ लागल्या. याबाबत तीने आजीला माहिती दिली.
आजीने तिला पाचोरा येथे आणत सोनोग्राफी केली. त्यावेळी ती गर्भवती असल्याचे निष्पन्न झाले. पीडितेच्या आईच्या संमतीने त्या मुलीचा डॉक्टरने गोळ्या देऊन तिचा गर्भपात घडवून आणला. दरम्यान, या मुलीनेच जळगाव येथील महिला दक्षता समितीला व्हाट्सअप मेसेज करुन मदतीची अपेक्षा व्यक्त केली. समितीने पाचोरा पोलिसांना ही घटना कळविली आणि ८ डिसेंबर रोजी या मुलीस पाचोरा पोलिस ठाण्यत बोलावून घेण्यात आले. तिच्याकडून रितसर फिर्याद नोंदवून घेण्यात आली. यानंतर गर्भपात करणाऱ्या डॉक्टरला अटक करण्यात आली आहे.
