जळगाव लाईव्ह न्यूज । ३० जुलै २०२५ । भडगाव तालुक्यातील पळासखेडे येथील बियर शॉपीवर अनाधिकृत देशी-विदेशी दारूची सर्रास विक्री होत असल्याची माहिती मिळाल्यांनतर पोलिसांनी धाड टाकून २८ हजारांची अनधिकृत दारू जप्त केली. याप्रकरणी एकावर गुन्हा दाखल करण्यात आला आहे.
याबाबत असे की, पळासखेडे येथील महिंदळे रस्त्यावर असलेल्या सूर्यमित्रा बियर शॉपीमध्ये अनाधिकृत देशी-विदेशी दारूची सर्रास विक्री होत असल्याची गुप्त माहिती भडगाव पोलीस निरीक्षक पांडुरंग पवार यांना मिळाली होती. या माहितीच्या आधारे काल रात्री भडगाव पोलिसांनी या बियर शॉपीवर धाड टाकली.
या कारवाईत पोलिसांनी २८ हजार रुपये किमतीचा अनधिकृत देशी-विदेशी दारूचा साठा जप्त केला आहे. संदीप जगदीश पवार (वय २२, रा. रुपनगर, पो. पळासखेडा, ता. भडगाव) हा व्यक्ती विक्रीच्या उद्देशाने विनापरवाना दारू बाळगताना आढळून आला. याप्रकरणी पोलीस कॉन्स्टेबल प्रवीण कडू परदेशी यांच्या फिर्यादीवरून भडगाव पोलीस ठाण्यात गुन्हा दाखल करण्यात आला आहे.
