जळगाव लाईव्ह न्यूज । १४ मार्च २०२१ । गुजरात राज्यातील अहमदाबाद येथून एका मुलीला पळवून जळगावात राहत असलेल्या तरुणाला एमआयडीसी पोलिसांनी अटक केली आहे.
लाम्सब्रीज पोलीस ठाणे अहमदाबाद येथे दाखल असलेल्या अपहरणाच्या गुन्ह्यातील तरुण पळवून आणलेल्या मुलीला घेऊन एमआयडीसी परिसरात राहत होता. लाम्सब्रीज पो.स्टे.चे सहाय्यक फौजदार अजय कुमार, हवालदार प्रभातसिंग आणि दोन महिला कर्मचारी रविवारी सकाळी एमआयडीसी पोलिसात आले होते. एमआयडीसी पो.स्टे.चे निरीक्षक प्रताप शिकारे यांची त्यांनी भेट घेतली असता उपनिरीक्षक रामकृष्ण पाटील आणि कर्मचारी गोविंदा पाटील यांना त्यांनी पथकासह रवाना केले. पथकाने जगवानी नगर, अयोध्या नगर, एमआयडीसी परिसरासह इतर नगरात याबाबत तपास केला. दाखल गुन्ह्यातील आरोपी मयूर अशोक पाटील रा.जळगाव हा एफ-६३ शाईन मेटल्स कंपनीत राहत असल्याची माहिती पथकाला मिळाली. पथकाने चौकशी करून मयूर पाटील यास पळवून आणलेल्या मुलीसह ताब्यात घेतले. दोघांना अहमदाबाद पोलिसांच्या स्वाधीन करून रवाना करण्यात आले आहे.
