जळगाव लाईव्ह न्यूज । ८ जानेवारी २०२६ । जळगाव शहरासह जिल्ह्यातील तापमानात सातत्यानं चढ-उतार होताना दिसत असून या आठवड्यात सलग दोन दिवसाच्या घसरणीनंतर बुधवारी जळगावच्या किमान तापमानात किंचित वाढ दिसून आली. मात्र दिवसाच्या कमाल तापमानात घसरण झाली. तापमानातील बदलाचा थंडीवर परिणाम झाला असून जळगावातील हुडहुडी पुन्हा एकदा कमी झालीय.
मंगळवारी १० अंशावर असलेलं किमान तापमान बुधवारी १०.७ अंशावर पोहोचले तर कमाल तापमान २६.८ वरून २५.२ अंशावर पोहोचले. दरम्यान, आजपासून पुढील दोन दिवस म्हणजे ९ जानेवारीपर्यंत जिल्ह्यात सकाळी माफक थंडी जाणवेल.
किमान तापमान ९ ते १२ अंशांदरम्यान राहील. यानंतर म्हणजे १० ते १४ जानेवारीपर्यंत म्हणजे मकरसंक्रांतीपर्यंत पुढील पाच दिवसांत पहाटेच्या किमान तापमानात काहीशी वाढ होऊन थंडीची तीव्रता कमी जाणवेल, असा अंदाज हवामान अभ्यासकांनी वर्तवला आहे.
सध्या तापमानातील बदलामुळे थंडीचा कडाका कमी झाला आहे. थंडीच्या कडाक्यातून जळगावकरांना दिलासा मिळाला असला तरी दुपारच्या वेळेस उन्हाचा चटका बसत असल्याने उकाडा जाणवत आहे. रात्री थंड वाऱ्यामुळे काहीशी हुडहुडी जाणवत आहे
