जळगाव लाईव्ह न्यूज । २४ एप्रिल २०२४ । सोने चांदी खरेदी (Gold Silver Rate) करणाऱ्या ग्राहकांसाठी एक आनंदाची बातमी आहे. ती म्हणजे सोन्यासह चांदीच्या दरात मोठी घसरण झाल्याचे पाहायला मिळत आहे. जळगाव सुवर्णनगरीत गेल्या दोन दिवसात सोने दरात १९०० रुपयाची घसरण झाली तर चांदी दरात तब्बल ३००० हजार रुपयाची घसरण झाली आहे.
मार्च आणि एप्रिल या दोन महिन्यांत सोने-चांदीच्या किमतीत धुवांधार बॅटिंग सुरु आहे. त्यातच इराण आणि इस्त्राईलमध्ये तणाव वाढल्याने सोन्यासह चांदीच्या किंमतींनी ऐतिहासिक टप्पा गाठला. गेल्या आठवड्यात जळगावात सोन्याचे दर विनाजीएसटी ७४२०० रुपये (१७ एप्रिल)प्रति तोळा या उच्चांकी पातळीवर पोहोचले होते. तर चांदीचा दर विनाजीएसटी ८४००० रुपये प्रति किलोवर पोहोचले होते. यामुळे ऐन उन्हाळ्यात सोने आणि चांदीने ग्राहकांना मोठा घाम फोडला.
रामनवमीला सोने आजवरच्या उच्चांकी ७४२०० (जीएसटीसह ७६४३०) रुपये तोळ्यावर पोहोचले होते. शनिवार (दि २०) आणि रविवार (दि २१) यात १०० रुपयांची किरकोळ घसरण झाली. सोमवारी (दि २२) बाजार उघडला तेव्हा दरात ७०० रुपयांची घसरण होत ७३४०० रुपये तोळा झाले. त्यापाठोपाठ काल मंगळवारी आणखी १२०० रुपयांनी भाव कमी झाले आणि सोने ७२२०० रुपये प्रति तोळा झाले आहे.
दरम्यान, सोन्याच्याच दरात घसरण झाली नाही, तर चांदीच्या दरात देखील घसरण झाली आहे. चांदीच्या दरात जवळपास ३००० रुपयांची घसरण झाली आहे. सध्या सराफा बाजारात चांदीचा दर हा विनाजीएसटी ८१००० रुपये किलो आहे. यापूर्वी दोन दिवसापूर्वी सोमवारी सकाळी चांदीचा दर हा ८४००० रुपये किलो होता. दरम्यान, अक्षय तृतीयेचा सण जवळ आला आहे. या पार्श्वभूमीवर सोन्या-चांदीच्या दरात घसरण झाली आहे. त्यामुळं सोनं चांदी खरेदी करणाऱ्यांसाठी दिलासा मिळाला आहे.
