जळगाव लाईव्ह न्यूज । १७ एप्रिल २०२५ । यावल तालुक्यातील डांभुर्णी शिवारातून एक खळबळजनक घटना समोर आलीय. ज्यात मेंढपाळ कुटुंबातील दोन वर्षीय बालिकेवर बिबट्याने झडप घालून तिला ठार केल्याची घटना आज १७ एप्रिल रोजी सकाळी उघडकीस आली. रत्नाबाई सतीश रुपनर (2) असे मृत बालिकेचे नाव आहे. काही दिवसांपूर्वीच डांभुर्णी जवळ असलेल्या किनगाव नजीक एक बालक बिबट्याच्या हल्ल्यात ठार झाल्याची घटना घडली होती. या पाठोपाठ आता बालिका ठार झाल्याने परिसर हादरला आहे. वन खात्याने बिबट्याचा तातडीने बंदोबस्त करण्याची मागणी आता होत आहे.
या घटनेबाबत असे की, यावल तालुक्यातील डांभुर्णी येथील शेत शिवारात गट क्र. ७४१ मध्ये मेंढपाळांचे तीन कुटुंब गेल्या पाच दिवसापासून वास्तवाला आहेत. दरम्यान काल मध्यरात्रीच्या सुमारास बिबट्याने या कुटुंबातील रत्नाबाई या दोन वर्षाच्या चिमुकलीला उचलून नेले. ती आपली आई जिजाबाई रूपनर हिच्यासोबत झोपलेली असतांना बिबट्याने झडप घालून तिला उचलून केळीच्या बागेत पसार झाला.
त्यांनी आरडाओरडा केला असला तरी रात्रीची वेळ असल्याने बिबट्या लागलीच पसार झाला. तर या बालिकेचा शोध घेतला असता थोड्या अंतरावर तिच्या शरीराचे लचके तोडलेल्या अवस्थेत मृतदेह आढळून आला. या दुर्घटनेमुळे परिसरातील शेतकरी आणि शेतमजुरांमध्ये भितीचे वातावरण असून आधीच दिवसा वीज नसल्याने रात्री-अपरात्री शेतकऱ्यांना शिवारात जावे लागते. यातच बिबट्याची परिसरात दहशत असल्याने शेतकरी संतप्त झाले आहेत. वन विभागाने या नरभक्षक बिबट्याला पकडण्याची मागणी आता होऊ लागली आहे.
