जळगाव लाईव्ह न्यूज । भुसावळ शहरात काही दिवसापूर्वीच पान टपरीचालकावर गोळीबार केल्याची घटना घडली होती. यांनतर आता शहरातील जुना सातारा परिसरातील हंबर्डीकर चाळ येथे किरकोळ वादाचे रूपांतर गंभीर घटनेत झाले. गावठी कट्टयातून हवेत गोळीबार करण्यात आल्याने परिसरात भीतीचे वातावरण पसरले. या प्रकरणी भुसावळ शहर पोलिस ठाण्यात गुन्हा दाखल करत चार आरोपींना बेड्या ठोकल्या आहे. यातील दोन आरोपी हे अल्पवयीन असल्याने इतर दोघांना न्यायालयात हजर केले असता, न्यायालयाने त्यांना दि. २ जानेवारीपर्यंत तीन दिवसांची पोलिस कोठडी सुनावली आहे.
संदीप मनोहर कोळेकर, रा. हंबर्डीकर चाळ यांचा चंद्रकांत उर्फ बाबा विनोद चेंगट आणि त्याच्या मित्रांसोबत हॉटेलमध्ये जेवण करताना वाद झाला होता. या वादाची कुरापत काढत बाबा बेंगट, कुंदन अनिल पठाडे आणि अन्य दोघांनी संदीप कोळेकर यांच्या परिसरात येऊन गोंधळ घातला. यावेळी चौघांपैकी एकाने गावठी बंदुकीतून हवेत गोळीबार केला, तसेच मुकेश सुरेश भोई या तरुणास मारहाण केली. या मारहाणीत मुकेश भोई यांना गंभीर दुखापत झाली असून, त्यांना जळगाव येथील जिल्हा रुग्णालयात दाखल केले आहे. संदीप कोळेकर यांच्या फिर्यादीवरून गुन्हा नोंदविण्यात आला आहे.
एक रिकामी पुंगळी आणि एक जिवंत काडतूस जप्त करण्यात आले आहे. तपासाला वेग देत पोलिसांनी चौघांना ताब्यात घेऊन अटक केली. चंद्रकांत उर्फ बाबा विनोद बॅगट व कुंदन अनिल पठाडे यांना न्यायालयाने तीन दिवसांची पोलिस कोठडी सुनावली.
