जळगाव लाईव्ह न्यूज । चोपडा शहर पोलिसांनी चुंचाळे येथे शेतात छापा टाकून तब्बल ५ लाख ३४ हजार २०० रुपये किमतीचा प्रतिबंधित एचटीबीटी (HTBT) कापूस बियाण्यांचा साठा जप्त केला आहे. याप्रकरणी एका संशयिताविरुद्ध गुन्हा दाखल करण्यात आला आहे.
मिळालेल्या माहितीनुसार, चुंचाळे येथील संशयित नितीन नंदलाल चौधरी याने आपल्या शेतात विक्रीच्या उद्देशाने प्रतिबंधित एचटीबीटी कापूस बियाण्यांचा बेकायदेशीर साठा केल्याची खात्रीशीर माहिती चोपडा शहर पोलिसांना मिळाली होती. या माहितीच्या आधारे पोलिसांनी संबंधित शेतात छापा टाकला. यावेळी पोलिसांना गोण्यांमध्ये लपवून ठेवलेला बियाण्यांचा साठा मिळून आला.
यानंतर पुढील तपासासाठी कृषी विभागाला घटनास्थळी बोलावण्यात आले. तालुका कृषी अधिकाऱ्यांनी तपासणी केली असता नऊ गोण्यांमध्ये एकूण २०२ किलो वजनाचे ४५० पाकिटे सापडले. शासनस्तरावर बंदी असलेल्या एचटीबीटी बियाण्यांची विनापरवाना साठवणूक आणि विक्री करण्याचा प्रयत्न केल्याप्रकरणी, जिल्हा परिषद कृषी अधिकाऱ्यांच्या फिर्यादीवरून संशयित नितीन चौधरी याच्याविरुद्ध चोपडा शहर पोलिस ठाण्यात विविध कलमान्वये गुन्हा नोंदवण्यात आला आहे.
