जळगाव लाईव्ह न्यूज । १६ मार्च २०२१ । अमळनेर रस्त्यावर अज्ञात ट्रॅक्टरने मोटर सायकलला धडक दिल्याने झालेल्या अपघातात पारोळ्यातील २२ वर्षीय तरुणाचा जागीच मृत्यू झाला तर एक जण जखमी झाल्याची घटना १५ मार्चला घडलीय.
स्वामी माधवराव (बाळासाहेब) पाटील (२२) असे अपघातात मृत्यू झालेल्या तरुणाचे नाव आहे. दरम्यान, या प्रकरणी पारोळा पोलिसात अज्ञात ट्रॅक्टर चालकाविरुध्द गुन्हा नोंद करण्यात आला आहे.
स्वामी पाटील व त्याचा मित्र हे अमळनेर रस्त्याने मोटरसायकल (क्र.एम.एच. १९- ७२५६) ने घराकडे येत असतांना समोरून भरधाव येणाऱ्या अज्ञात ट्रॅक्टरने मोटरसायकलला जोरदार धडक दिली. त्यात स्वामी पाटील याला डोक्याला मार लागल्याने त्याचा जागेवरच मृत्यू झाला तर त्याच्या मित्रास पायला जबरदस्त मार लागला. स्वामीप्रसाद हा सिव्हील इंजिनियर होता. त्याच्या पश्चात आई, वडिल, बहिण, ४ भाऊ, असा परिवार असुन तो पारोळा येथील दै.देशदुतचे जेष्ठ पत्रकार बाळासाहेब पाटील यांचा लहान मुलगा तर पत्रकार योगेश आणि नितिन पाटील यांचा लहान भाऊ होत. स्वामीच्या निधनाने शहरात हळहळ व्यक्त होत आहे. या बाबत पारोळा पोलीसात अज्ञात ट्रॅक्टर चालका विरुध्द गुन्हा नोंद करण्यात आला आहे.
