जळगाव लाईव्ह न्यूज । महामार्ग ६ वरील जळगाव-भुसावळ दरम्यानच्या नशिराबाद टोलनाक्याजवळ भीषण अपघात झाला. भरधाव कारचा ताबा सुटल्याने झालेल्या अपघातात तरुणीचा जागीच मृत्यू झाला. झोया नदीम पठाण (वय २२, रा. भुसावळ) असं मयत तरुणीचे नाव आहे. दरम्यान या घटनेत एक तरुण गंभीर जखमी झाला असून त्याच्यावर रुग्णालयात उपचार सुरू आहेत. या प्रकरणी नशिराबाद पोलीस ठाण्यात नोंद घेण्यात आली आहे.
ही घटना गुरुवारी २२ जानेवारी रोजी रात्री घडली. मिळालेल्या माहितीनुसार, जळगावकडून भुसावळच्या दिशेने जाणारी इनोव्हा कार (क्र. एमएच १९ बीयू ७१८६) नशिराबादजवळ आली असता, चालकाचा गाडीवरील ताबा सुटला. वेगात असलेली ही कार महामार्गावरील दुभाजक (डिव्हायडर) तोडून थेट विरुद्ध दिशेच्या मार्गिकेवर गेली आणि समोरून येणाऱ्या कंटेनरवर (क्र. जीजे ०१ डीएक्स ९४९७) जाऊन जोरात आदळली.
या भीषण दुर्घटनेत कारमध्ये बसलेली झोया पठाण या महिलेचा गंभीर दुखापत झाल्याने जागीच मृत्यू झाला. तर भुसावळ येथील प्रसिद्ध ‘सोना डेअरी’च्या संचालकांचा मुलगा अरबान खान (वय २६) हा गंभीर जखमी झाला आहे. त्याला तातडीने जळगाव येथील गोदावरी रुग्णालयात दाखल करण्यात आले
अपघाताची माहिती मिळताच नशिराबाद पोलिसांनी तातडीने घटनास्थळी धाव घेतली. अपघाताचे नेमके कारण अद्याप स्पष्ट झाले नसून, नशिराबाद पोलीस या प्रकरणाचा अधिक तपास करत आहेत.
