जळगाव लाईव्ह न्यूज । २७ एप्रिल २०२१ । जळगाव जिल्ह्यात कोरोनाच्या दररोज आढळून येणाऱ्या नव्या बाधितांची संख्या स्थिर असली तरी मृत्यूसत्र सुरुच आहे. मंगळवारी प्राप्त अहवालानुसार जिल्ह्यात २३ जणांचा बळी गेला. तर १०१२ नवे बाधित रुग्ण आढळले आहे. यात जळगाव शहरासह चोपडा, एरंडोल, रावेर, भुसावळ, मुक्ताईनगर, बोदवड तालुक्यात संसर्ग कायम आहे. हा संसर्ग कमी करण्यासाठी नागरीकांनी काळजी घेणे हाच एक पर्याय आहे.
मार्च व एप्रिलच्या प्रारंभी कोरोनाने घातलेले थैमान जिल्ह्यात काहीअंशी कमी झाले आहे. गेल्या दोन आठवड्यांपूासून नव्याने बाधितांची संख्या स्थिर असून बरे होणाऱ्यांचा आकडा समाधानकारक आहे. आज मंगळवारी १०१२ नवे रुग्ण आढळून आले तर ९९५ रुग्ण दिवसभरात बरे झाले.
दरम्यान, जिल्ह्यातील एकूण रुग्णसंख्या १ लाख १८ हजार ९२८ इतकी आहे. त्यापैकी बरे होणाऱ्यांची संख्या १ लाख ५ हजार ९०१ वर पोचली आहे. जिल्ह्यातील मृत्युदर अद्यापही चिंतेची बाब आहे. गेल्या २४ तासांत आणखी २३ रुग्णांचा बळी गेला. त्यामुळे बळींचा आकडा २ हजार १२२ झाला आहे.
जळगाव शहर- १६३, जळगाव ग्रामीण- ५६, भुसावळ-४९, अमळनेर-४६, चोपडा- ५३, पाचोरा- ५९, भडगाव-३३, धरणगाव- २७, यावल- २६, एरंडोल- १००, जामनेर- ५९, रावेर- ९६, पारोळा- ३७, चाळीसगाव- ६४, मुक्ताईनगर- १७, बोदवड-१२० आणि इतर जिल्हे ०७ असे एकुण १०१२ बाधित रूग्ण आढळले आहे.