जळगाव लाईव्ह न्यूज ।२० एप्रिल २०२२ । आंतरराष्ट्रीय घडामोडीमुळे सोने आणि चांदीचं भावात सातत्याने चढ-उतार सुरु आहे. कालच्या दरवाढीनंतर आज सोने आणि चांदीच्या भावात मोठी घसरण झाली आहे. आज जळगाव सराफ बाजारात १० ग्रॅम सोन्याच्या भावात ५३० रुपयाची घसरण झाली आहे. तर दुसरीकडे चांदी तब्बल १२४० रुपयाने स्वस्त झाली आहे. आजच्या घसरणीनंतर सोन्याचा प्रति तोळ्याचा भाव ५४ हजाराखाली आला आहे. यापूर्वी काल सकाळच्या सत्रात सोने २९० रुपयाने तर चांदी ९७० रुपयाने महागली होती.
आजचा प्रति तोळ्याचा भाव? Gold Silver Rate Today
बुधवारी जळगाव सुवर्ण नगरीत २४ कॅरेट १० ग्रॅम सोन्याचा भाव ५३,९९० रुपये इतका आहे. तर चांदी ७०,३८० रुपये प्रति किलो इतका आहे. दरम्यान, सराफ व्यवसायिकांकडून सोन्यावर जीएसटी, आयात शुल्क आणि घडणावळ शुल्क आकारले जाते. त्यामुळे सोन्याच्या दरात काही हजारांची वाढ दिसून येते.
गेल्या मागील काही सत्रापासून सोने आणि चांदीचे दर वर-खाली होत आहे. कोरोनाची चौथी लाट आणि वाढलेल्या अनिश्चित वातावरणात सोने -चांदी तेजीने लकाकून निघाले होते. मात्र आज दरवाढीला ब्रेक लागला असून सकाळच्या सत्रात सोने चांदीच्या भावात मोठी घसरण दिसून आली. सोन्या चांदीचे भाव हे दिवसातून दोनदा बदलतात. सकाळी मार्केट सुरू होताच भाव जाहीर होतात. तर दुसऱ्यांदा सायंकाळी सहाच्या दरम्यान पुन्हा एकदा भाव जाहीर केले जातात.
दरम्यान, रशिया-युक्रेन युद्धापूर्वी सराफ बाजारात सोन्याचा भाव ४८ ते ४९ हजाराच्या घरात होते मात्र युद्धानंतर सोने दरात मोठी वाढ दिसून आली. रशिया-युक्रेनमधील युद्धादरम्यान सोने तब्बल ४ ते ५ हजार रुपयांनी महागले होते गेल्या महिन्यातील ९ तारखेला सोन्याच्या दराने ५५ हजाराचा टप्पा पार केला होता. यापूर्वी कोरोनाच्या पहिल्या लॉकडाऊनमध्ये सोने (ऑगस्ट २०२०) ५६,२०० प्रति तोळ्यावर गेले होते. जळगाव सराफ बाजारात गेल्या आठ्वड्यात सोने १२०० ते १३०० रुपयांनी महागले. तर दुसरीकडे चांदी २७०० ते २८०० रुपयांनी महागली.
गेल्या आठवड्यातील दर?
जळगावमध्ये ११ एप्रिल रोजी २४ कॅरेट सोन्याचे दर ५३,२९० रुपये होते. १२ एप्रिल रोजी ५३,४००, १३ एप्रिल रोजी ५४,१२०, तर १४ एप्रिल ५४,३३० रुपये प्रति तोळा असा होता. तर दुसरीकडे ११ एप्रिल रोजी चांदी दर ६८,५६० प्रति किलो होती. १२ एप्रिल ६८,८७०, १३ एप्रिल ७०,४०० तर १४ एप्रिल ला ७१,०९० प्रति किलो इतका होता.
सोन्याची प्युअरीटी कशी तपासावी?
सोनं शुद्ध आहे की अशुद्ध, हे तपासणं सोनं खरेदीच्या दृष्टीनं महत्त्वाचं असतं. सोनं खरेदीवेळी त्यावर हॉलमार्कचे निशाण असतात. या हॉलमार्कवर 24 कॅरेटपर्यंतची माहिती दिलेली असते. 22 कॅरेट सोनं असेल तर त्यावर 916 असं नमूद केलेलं असतं. तर 21 कॅरेट सोन्यावर 875 असं लिहिलेलं असतं. 18 कॅरेट सोन्यावर 750 तर 14 कॅरेट सोन्यावर 585 असं नमूद केलेलं असतं.
